D’Wäisst Haus huet och matgedeelt, datt et bei der neier Importtax vun 10 Prozent eng ganz Rei vun Ausname soll ginn: si soll net fir Pharma-Produkter gëllen, an zum Beispill net fir Autoen a schwéier Camionen.
Den US-President Donald Trump hat matgedeelt, hien hätt eng “weltwäit 10-Prozent-Tax fir all Länner” ënnerschriwwen.
Dat Iewescht Geriicht an den USA hat um Freideg decidéiert, datt hien an der Vergaangenheet Taxen net iwwer een Noutstandsgesetz hätt dierften entscheeden.
Tax op Basis vun Handelsgesetz vun 1974
Duerno hat et vum US-President geheescht, datt hien “alternativ Weeër” wéilt notzen, fir u senger Strategie festzehalen.
Fir seng nei Tax vun 10 Prozent baséiert den Donald Trump sech op een Handelsgesetz vun 1974: dëst erlaabt et, Taxen op Importer fir een Zäitraum vu bis zu 150 Deeg opzehiewen.
Fir méi e laangen Zäitraum bräicht de President d’Zoustëmmung vum US-Parlament.
