Haut hat de Petitionär Bryan Jaeger d’Geleeënheet, den Deputéierten, grad wéi der Ministerin Martine Deprez seng Fuerderungen ze presentéieren.
"Mir sinn net nëmmen do, fir eng Fleeg ze maachen, esou datt de Bewunner propper ass. De Klischee ass halt nach ëmmer esou, datt mir den Hënneschten nëmme propper maachen. Mee et ass leider net esou. Mir ënnerstëtzen an hëllefen do, wou et wichteg ass."
Net just d'Pai, déi zielt
Eng 6.000 Aide-soignantë schaffen de Moment hei am Land, war an der Chamber ze héieren. Am éischte Joer am Beruff verdéngt een Aide-soignant knapp 3.700 Euro brutto de Mount, esou eng weider Zuel, déi genannt gouf.
Dozou d’Aide-soignante Adèle Fiorucci-Lang, déi de Petitionär begleet huet, an déi scho méi laang am Beruff schafft.
"D’Wäertschätzung geet a mengen Aen net iwwert d’Pai. Do komme ganz aner Facteuren an d’Spill, virun allem Respekt."
Martine Deprez: All Gesondheetsberuffer si gläichwäerteg
Am Gesetz géif et keng Spuer vu manner Wäertschätzung ginn, esou d’Ministerin Martine Deprez an der Debatt an der Chamber. All Gesondheetsberuffer wiere gläichwäerteg mat hire Missiounen opgelëscht.
"Heiansdo si verschidde Missiounen, déi eben ënnert der Supervisioun vun enger Infirmière beim Aide-soignant mussen ausgefouert ginn, well de Legislateur dat esou decidéiert huet, fir eben ze garantéieren, datt een net eleng do steet, wann herno eppes schif geet."
Wat d’Ausbildung ugeet huet d’Gesondheetsministerin erkläert, datt et de Moment eng “Ëmbrochphas” géif ginn. D’Martine Deprez huet ugekënnegt, datt spéitstens 2028 kéint doriwwer nogeduecht ginn, d’Ausbildung vum Aide-soignant ëm ee Joer ze verlängeren, fir se mat engem Bac général kënnen ofzeschléissen.
An nom Debat Public vun haut soll deemnächst eng Reunioun vun de véier Chamberkommissioune fir Gesondheet, Educatioun, Héichschoul a Petitiounen organiséiert ginn, fir ënner anerem virun iwwert de Beruff vum Aide-soignant ze diskutéieren. Dat gouf no der Sitzung decidéiert.