Um 13 Auer mëttes geet déi warscheinlech leschte Sëtzung vum Bundestag ënner dem Bundeskanzler Olaf Scholz un. No enger Ried vum Scholz selwer an enger Debatt vu ronn zwou Stonnen, stëmmen déi 733 Deputéiert am däitsche Parlament dann of. Et ass dovun auszegoen, datt de Kanzler keng Majoritéit wäert kréien. Dat bedeit, datt den Olaf Scholz duerno direkt bei de Bundespresident Frank-Walter Steinmeier fiert, an dee freet, d'Parlament opzeléisen an Neiwalen unzesetzen.
Neiwale wuel den 23. Februar
Den Oflaf vum Enn vun der aktueller Regierung, dee steet mëttlerweil zanter engem gudde Mount fest. Haut um Méindeg ass et schliisslech esou wäit, wéi den Olaf Scholz erkläert huet.
"Folgt der Bundespresident meinem Vorschlag, dann werden die Wählerinnen und Wähler am 23. Februar einen neuen Bundestag wählen können. Das ist mein Ziel. In einer Demokratie sind es die Wählerinnen und Wähler, die den Kurs einer Demokratie bestimmen. Sie entscheiden bei der Wahl, wie wir die grossen Fragen beantworten, die vor uns liegen."
Éier Enn Februar dann neigewielt gëtt, bleiwe Regierung a Bundestag weider am Amt. An zwar wäert de Walkampf da muer un Dënschdeg scho lassgoen, wann déi éischt Parteien hire Walprogramm festleeën. D'Nach-Regierung huet awer nach e puer Pläng.
Virun allem dat sougenannte Steuerfortentwicklungsgesetz soll nach duerch d'Parlament goen. Domat soll d'Kannergeld erhéicht ginn, genee wéi och de Steierfräibetrag. Iwwer déi Moossnamen si sech SPD, B90/Die Grünen an FDP eens. Also genee déi dräi Parteien, där hire Sträit zu den Neiwale geféiert huet.
Wat bei deene virgezunnen Neiwalen op Däitschland kéint duerkommen, dat hunn d’Walen am Hierscht an den ostdäitsche Bundeslänner Brandenburg, Sachsen an Thüringe schonn ugedeit: Den ale Parteiesystem ass op d’Kopp gestallt, Koalitioune ginn ëmmer méi schwéier ze fannen. Eng Analys vun eisem Däitschland-Korrespondent Matthias Kirsch.