Fir déi Olympesch Summerspiller 2024 zu Paräis opzemaachen, ass a véier Méint, de 26. Juli, ee Spektakel mat 600 Booter op der Seine geplangt. Wéinst dem russeschen Ugrëffskrich an der Ukrain goufen d’Athleten aus Russland an aus Belarus vun dëser Zeremonie ausgeschloss.
Et gëtt probéiert eng Balance ze erreechen
Dës Entscheedung hat den IOC d’lescht Woch zu Lausanne geholl. De President vum Lëtzebuerger Olympesche Comité (COSL), André Hoffmann gëtt zou, datt een, egal wéi een et mécht, et falsch mécht.
„Ech mengen et ass gutt, datt den IOC de Punkt markéiert a seet, et ass net fir déi ze feieren. Mir wëllen op där anerer Säit awer och den Individualsportler net sanktionéiere fir dat wat hir Potentater ganz uewe maachen. Ech mengen et ass déi Balance, déi ee probéiert domat ze erreechen.“
Eenzelsportler ënner neutralem Fändel
Bei de Competitioune vun den Olympesche Summerspiller si d‘Ekippen aus Russland an aus Belarus ganz ausgeschloss.
Eenzelsportler mussen ënner neutralem Fändel untrieden: si däerfen zum Beispill keng national Symboler droen.
„Dat hëlt vill Polemik ewech“
Bei der Erëffnungszeremonie de 26. Juli zu Paräis dierfe si awer nëmmen als Zuschauer mat dobäi sinn. Perséinlech, géif den André Hoffmann dat gutt fannen.
„Ouni, datt dat onbedéngt d’Meenung vum COSL ass, datt si déi Decisioun geholl hunn. Dat hëlt vill Polemik ewech, et hëlt och vill Initiativen ewech, déi ee sech hätt kënnen erwaarde vu Boykott iwwer Banderolle wärend der Feier.“
Déi Suerge wieren domat vum Dësch, begréisst den André Hoffmann.
