Dem Lënster Buergermeeschter Ben Ries no, konnten all déi wichteg Dokumenter aus de Raimlechkeete gerett ginn, ausser déi an den Archiven – do wéisst een nach net wéi grouss de Schued schlussendlech wäert sinn. Een Deel vun den Archive wier och extern op Serveren digitaliséiert gewiescht. D'Gemengepersonal wäert elo d'Aarbecht per Teletravail viru féieren. Et gëtt och een Deel vum Gebai ofgerappt, fir besser un d'Feier erunzekommen.
"Wat awer definitiv verluer ass, dat sinn d’Pläng vun Gemengegebaier. Dat geet wahrscheinlech zréck bis déi lescht honnert Joren an do wësse mer net genau, wéi et ausgesäit. Am Nomëtten kënnte mer anscheinend, laut de Pompjeeën, eragoen an d'Archiven kucken wat do nach ze retten ass. Do ginn et jo ëmmer Méiglechkeeten fir déi ze restauréieren, deemno wéi se ausgesinn."
D‘Feier gouf kuerz no Mëtternuecht detektéiert, mellt den CGDIS. Et ware 14 Pompjeescorpsen am Asaz. Méi wéi d‘Hallschent vum Gemengenhaus ass duerch d‘Feier impaktéiert. De Buergermeeschter Ben Ries sot de Moien am 100,7-Interview, d‘Feier wier ënner Kontroll, an all déi wichteg Dokumenter, ausser déi aus den Archiven, konnte gerett ginn. D’Brandursaach bléift weiderhin onbekannt.
Iwwerdeems huet d’Gemeng Jonglënster eng Urgencen-Nummer fir d’Bierger en place gesat. Am Noutfall kënnen d’ Leit den 78 72 72 – 1000 uruffen.
