Muer um Freideg gëtt den neie President gewielt. Bis elo war de Guy Feyder vun der Bauerenzentral op deem Posten. Seng Lëscht an hie selwer kruten och déi meeschte Stëmmen a kommen op sechs Sëtz. De Kandidat vun der Bauerenzentral gesäit dann och e kloert Mandat.
Well déi zwou aner Lëschten awer mat fënnef, respektiv véier Sëtz, knapp hannendru leien, gesinn och si sech als Walgewënner.
Zwee géint een?
Gëschter koume Vetrieder vun den dräi Lëschten zesumme fir e Konsens ze fannen. An engem Schreiwes, dat d’Lëscht “Zesumme méi stark” dobäi virgeluecht huet, heescht et, datt een d’Kandidatur vum Christian Hahn vun der Lëscht “Aktiv Baueren fir eng stark Landwirtschaft” géif ënnerstëtzen. Dat am Sënn vun enger Erneierung vun de Gremien an an der Landwirtschaftskammer.
Sollt et net zu engem Kompromëss kommen, mee zu enger Kampfofstëmmung, wier d’Presidence vum Guy Feyder net méi ze halen. Eisen Informatiounen no kéint d’Bauerenzentral als Alternativ den aktuelle President vun der Bauerenzentral Christian Wester als Kandidat virschloen. Als Vize-President kéim deemno de Paul Funck vun de Wënzer zum Zoch.