Max Tholl (Paräis)
Eng an eng hallef Stonn stoung de Michel Barnier virum Mikro an der Assemblée an huet seng Feuille de route skizzéiert. Services publics, d’Sécherheet, d’Immigratioun oder d’Liewenskäschte vun de Fransouse waren dobäi e puer vun de Prioritéiten, op déi de Premier sech fokusséiere wëll.
Eng Iwwerraschung beim Mindestloun
Direkt um Ufank huet de Barnier vun enger duebeler Exigenz geschwat, ëm déi ee sech dréngend këmmere misst, nämlech déi Budgetär an déi Ekologesch. De Staatsdefizit soll d’nächst Joer vun aktuell 6 Prozent op 5 Prozent reduzéiert ginn, fir e perspektivesch op 3 Prozent ze kréien. Dowéinst fuerdert de Barnier méi Hëllef vun de groussen Entreprisen an och eng Steiererhéijung fir d’Spëtzeverdénger.
Mat Bléck op de Klimawandel wéist sech de Barnier mat der aktueller Politik zefridden a huet wéineg Konkretes proposéiert. Déi villäicht gréissten Iwwerraschung ass eng Upassung vun 2 Prozent vum Mindestloun, déi schonn nächste Mount kënnt.
Kontroll bei der Immigratioun verluer
Bei der Immigratiounspolitik huet de Barnier gesot, et hätt een d’Kontroll verluer, dofir misst een elo mënschlech, mee pragmatesch virgoen. Zum Beispill soll et mei einfach ginn, illegal Auslänner, déi d’Land verloosse mussen, ze inhaftéieren, bis se expulséiert ginn. Och sollen d’Asylprozedure beschleunegt ginn.
Ganz zum Schluss huet hie sech un d’Oppositioun geriicht an un hir Kompromëssbereetschaft appelléiert. Den Eescht vun der Lag géing dat elo erfuerderen, sou de Barnier.