Mat groussem Succès wier schonn d’lescht Joer ugefaange ginn, an eenzele Schoulen op de Wee vu méi Bio-Produkter a méi regionale Produkter an de Kantinnen ze goen, erkläert de Minister Claude Meisch.
De méi groussen Asaz vu Bio a regionale Produkter soll fir all Kantinne vun de Lycéeën a vun der Universitéit gëllen, preziséiert de Claude Meisch: Deemno géif et ëm eng grouss Quantitéit goen. Dat géif een Zeeche setze fir d‘Produzenten, hir Produktioun ëmzestellen.
„Wëssend, datt eben hei ee groussen Acteur do ass, wéi Restopolis, déi dat da Joer fir Joer och wäert brauchen.“
Claude Meisch: D'Gesellschaft profitéiert dovun
Wat de Käschtepunkt vun dëser geplangter Ëmstellung vun de Wueren an de Schoulkantinne wäert sinn, wier nach schwéier ze soen. Et wier et awer der wäert, och wann et ënnert dem Stréch méi deier gëtt. D’Gesellschaft géif dovu profitéieren, ënnersträicht den Educatiounsminister.
De Mouvement Ecologique hat rezent d’Kritik widderholl, datt an de Lëtzebuerger Schoulen nach ëmmer ze wéineg Bio-Uebst an ze wéineg regionaalt Uebst géifen agesat ginn.