Wéi eng Fäegkeete brénge Schüler:inne mat, wa si an d'Schoul kommen, a wéi kann een déi weider entwéckelen. Dat ass d'Basis vum Rudolf Steiner senger Pedagogie, mat deem een de Cours an der Waldorfschoul organiséiert.
Eng Method, déi d'Léierpersonal beispillsweis dofir notzt, ass déi vum Dräischrëtt. Wéi den Numm et verréit, schafft een hei an dräi Etappen. Ugefaange mam Erliefnis. Iwwer eng Geschicht zum Beispill ginn d'Schüler a Schülerinne mat engem Theema eng éischte Kéier konfrontéiert. De Léierprozess geet dann eigentlech eréischt den Dag drop weider, wéi de Schoulmeeschter Helge Schuh erkläert.
"Den nächsten Dag kann een nofroen, et huet ee bëssen iwwerluecht, wat dat kéint sinn. An da kënne mir doriwwer schwätzen, an den drëtten Dag, da gëtt et da wierklech am Fong akadeemesch an et kann een e bësse Struktur erabréngen."
D'Zil ass et an der leschter Etapp duerch Repetitioun a kreativ Aufgaben dat Geléiert ze verënnerlechen.
Prinzip vun der Selbstverwaltung
Wie säi Kand an d'Waldorfschoul aschreift, muss eng gewëssen Iwwerzeegung vun där Pedagogie matbréngen. Et ass een als Elterendeel nämlech och vill an d'Verwaltung vun der Schoul agebonnen. D'Eltere ginn zum Beispill encouragéiert Member vum Eltererot ze ginn, a bei organisatoreschen Tâchen ze hëllefen oder generell Feedback ze ginn.
De Prinzip vun der Selbstverwaltung, gëtt awer dacks kritiséiert. Also de Fait, datt Léierpersonal, Elteren a Schüler:innen d'Verantwortung huele fir Organisatioun, Pedagogie a Verwaltung.
D'Eugenia Beirer ass zoustänneg fir d'Kommunikatioun an der Waldorfschoul. Si gesäit dora kee Problem a betount, datt et op d'Gemeinschaft ukënnt.
De Michael Schulz, President vun der Waldorfschoul ASBL erkläert, datt wann eng Stuf an der Schoul ee Problem huet, da sollt si déi ënner sech ausmaache kënnen.
"In dem Moment, in dem die ganze Schule oder andere Bereiche der Schule betroffen sind, dann muss man sich eben in Verbindung setzen mit anderen Bereichen."
Fir Froen, déi doriwwer erausginn, géif et eng Schoulleedung ginn, de Comité vun der Waldorfschoul ASBL.
Och d'Waldorfschoul muss sech u verschidde Reegelen halen
D'Schoul géif iwwerdeems trotz där Selbstverwaltung Reegele gesat kréien, un déi si sech mussen halen, esou nach de Michael Schulz. Et géif also eng Kontroll ginn, seet hien.
"Es gibt zwei externe Instanzen für unsere Schule. Einmal gibt es das Erziehungsministerium. Das ist sowohl für den gesamten schulischen Bereich als auch nochmal gesondert für die Maison relais zuständig."
Dobäi kéim och nach de Bac International (IB), fir dee vun der Douzième un d'Notten op de Prüfungen och extern mussen evaluéiert ginn. Schüler:innen aus de méi nidderege Klasse kréie just op Nofro Notten. Wa si d'Schoul wiesselen zum Beispill.
Ee schrëftleche Bilan am Joer
D'Léierpersonal muss nämlech, fir intern Zwecker, Notte fir hir Schüler:innen androen. Och wann d'Eltere just ee Bilan am Joer kréien, a Form vun engem Text. An deem Bilan gëtt ënner anerem de Charakter beschriwwen, wéi si sech druginn hunn a wéi eng Kompetenzen nach kënnen ausgebaut ginn.
D'Dr. Priska Ballmaier ënnerriicht Däitsch an der Waldorfschoul. Zu de Krittäre fir d'Evaluéierung gehéiert ënner anerem d'Matschaffen am Cours oder d'Aarbecht a Gruppen, erkläert si.
"Und bei schriftlichen Arbeiten achte ich natürlich auf den argumentativen roten Faden. Hat der Text eine Struktur, hat der einen Einleitungs- und Hauptteil und einen Schluss? Und dann natürlich, wie ist das sprachliche Niveau."
Geet d'Mediekompetenz ënner?
E weidere Kritikpunkt, deen dacks geäussert gëtt, ass deen, datt d'Waldorfpedagogik net méi zäitgeméiss wier. Een Theema dat do reegelméisseg opkënnt, ass dat vun de Mediekompetenzen. D'Schüler:innen hunn nämlech eréischt vun der Neuvième un Informatik-Coursen.
Bei ëffentleche Schoule gi schonn ab de Zyklen 3 a 4, also schonn am Primaire, déi éischt digital Kompetenzen am Cours vermëttelt. Fir dem Fortschrëtt nozekommen hätt een de Programm an der Waldorfschoul awer mëttlerweil ugepasst, seet d'Dr. Priska Ballmaier:
"Wir haben ein Medienkonzept hier erstellt, für unsere Schule, indem die Dinger thematisiert werden. Wir haben auch externe Referenten, die kommen also, dass dann die Schülerinnen und Schüler sensibilisiert werden."
D'Léierpersonal muss fir an der Waldorfschoul ze ënnerriichten e Studium oder eng Ausbildung, wéi am Handwierk zum Beispill, an hirem Fach ofgeschloss hunn. Dobäi kommen dann nach spezifesch Waldorfausbildungen. Esou wéilt ee sécher stellen, datt d'Schüler:innen eng héich qualitativ Ausbildung kréien.
