Digitales Youth work in the digital era

D'Grondiddie wier et, Leit aus der ganzer EU zesummenzebréngen, fir dann iwwer Methoden an Approchen ze schwätzen, wéi een d'Jugendaarbecht méi digital gestalten an op déi aktuell Entwécklunge reagéiere kéint, esou de Jeff Faltz vum SNJ. 70 Jugendaarbechter aus 19 EU-Länner si fir dësen Echange bis op Lëtzebuerg komm.

Mee wéi ass d'Situatioun hei zu Lëtzebuerg, wann ee sech déi digital Jugendaarbecht ukuckt? De Jeff Faltz mengt, datt déi éischt richteg Schrëtt gemaach goufen, "mee ech menge mir sinn awer nach net ganz do, wou mer hiwëllen".

Als SNJ wéilt ee weisen, datt eng digital Aarbecht mat Jonke mëttlerweil e feste Bestanddeel wier, an datt dat och guer net komplizéiert misst sinn, esou de Jeff Faltz. Dofir missten an Zukunft awer och weider Offere geschafen a vermëttelt ginn.

D'Konferenz Youth work in the digital era ass dann och e gudde Moment fir d'Situatioun hei mat anere Länner ze vergläichen, de Jeff Faltz mat engem Beispill.

"Ech hu mat enger Participante aus Rumänie geschwat. Si huet mir gezielt, datt si do fir eng kleng ONG schafft, an do wier et schwiereg fir sech an deem Beräich ze positionéieren, well et net onbedéngt eng Prioritéit vun der Politik ass. "

Nieft enger Rei Rieden an Diskussiounen ëm d'Thema Digitales an der Jugendaarbecht sinn och Atelieren Deel vun der Konferenz, an deenen da konkret Methoden a Projete virgestallt ginn.