News for Kids
An den News for Kids geet et ëm Aarbechtszäiten, well op der Aarbecht gesäit et dëser Deeg wéinst dem Coronavirus ganz aneschters aus wéi soss. D'Regierung huet deenen enge gesot, si dierften net méi schaffen, an deenen aneren huet d'Regierung gesot, si dierfte méi laang schaffen.
D'Carole Schimmer aus eise Noriichteredaktioun erkläert iech déi Situatioun.
Der Blannschécher op der Spuer
Et ass dat Déier, dat wéi eng Schlaang ausgesäit, awer et ass keng Schlaang. En Déier, dat dir och hei zu Lëtzebuerg fannt. Et ass de Blannschlécher an d'Martine Hoffmann vum natur musée weess vill iwwer dat d'Déier z'erzielen an dir, Kanner, wësst dann och, wann dir emol e Blannschlécher gesitt, datt och wann e wéi eng Schlaang ausgesäit, et awer e Reptil, eng Eidechs oder e Krokodil ass.
Ech gesinn eppes, wat s du net gesäis
De Mudam, de Musée fir modern Konscht um Kierchbierg, proposéiert iech eng Serie, déi nennt sech "Ech gesinn, wat s du net gesäit " An do stellt sech ee Konschtwierk selwer vir, an dir kënnt et duerno esou molen, wéi dir iech et virstellt, an eis dann äert Bild iwwer klassesall@100komma7.lu eraschécken.
Gelies an erzielt - De Grüffelo
Kennt dir de Grüffelo? Ma déi kleng frech Maus huet och gemengt, et géif hie just an hirer Fantasie ginn, mee et kënnt jo ëmmer alles anescht. Lauschtert der klenger Maus hir Aventuren, d'Paule Rodesch aus eiser Noriichteredaktioun erzielt iech d'Geschicht.
De Grüffelo ass eng Geschicht vun der brittescher Schrëftstellerin Julia Donaldson. Op Lëtzebuergesch koum d'Buch bei Editions Binsfeld eraus. De Grüffelo gouf vun der Martine Schoellen op Lëtzebuergesch iwwersat.
D'100,7-Aufgab vum Dag - Eis gebaute Welt-Doheem
Et ass eben esou, a mer kënne näischt drun änneren, an et soll een dat bescht draus maachen. Well mer den Ament jo all mussen doheem bleiwen, profitéieren mer dovun eis Nascht, also eist Doheem emol richteg ze entdecken a kennenzeléieren, an dat ass dann och schonn de Fong vun der 100,7-Aufgab vum Dag, zesumme mam Script. Der Architekturproff Martine Bintner geet et dobäi ëm e ganz besonnesche Baudeel vum Haus, dee mer brauche fir Kontakt mat der Welt dobaussen ze hunn.
All Wunneng oder all Haus, egal wéi grouss oder kleng et ass, huet esou eppes. Rieds geet natierlech vun der Fënster. An d'Aufgab ass et, fir är léifste Fënster vu baussen a vu bannen esou schéi wéi méiglech ze rëschten an eng Foto dovun ze maachen. An déi Foto schéckt dir dann op challenge@script.lu
Mir schreiwen zesummen e Buch
An dann um Enn nach déi Rubrik, op déi mer all ganz virwëtzeg sinn, nämlech wéi geet et weider mam Buch, dat mat iech Kanner zesumme schreiwen. Mer sinn also beim 4. Kapitel vun eisem Buch ukomm. De Roland Meyer huet eis jo dat véiert Kapitel virgelies, an elo koumen dann nei Detailer iwwer d'E-Mail klassesall@100komma7.lu eran, wéi d'Geschicht kéint weidergoen.
Op alle Fall huet de Roland Meyer eis verroden, datt d'Sanni an de Raphael sollen an der Hiel weidergoen, oder et gëtt gemengt, déi "Gestalt" wär nach baussent der Hiel, an ee Kand huet och ganz schéi Gefiller beschriwwen. Mer kënnen deemno op dat 5. Kapitel muer am Klassesall elo scho gespaant sinn.
Ech hoffen iech geet et wéi eis hei um Radio, mer freeën eis elo schonn op de Klassesall vu muer. A wann dir eis är Iddie wëllt eraschécke oder eis soss wëllt eppes soen, oder är Zeechnungen, da kënnt dir alles iwwer d'E-Mail Adress klassesall@100komma7.lu maachen.
A wann dir iech e Musekstitel wëllt wënschen, oder eis wëllt eppes soen, mer hunn och nach eng Whats App an d'Nummer, déi ass 621 44 00 44
A wéi ëmmer: vill Spaass Kanner mam 100,7 Klassesall
