Album vun der Woch Voka Gentle - WRITHING!

Chaotesch Zäite féieren zu chaotescher Musek. Mee de Chaos um neie Voka Gentle Album kann ee roueg als erfrëschend beschreiwen. Op "WRITHING!" kritt ee keng Revolt, mee vill komescht Gekrëmms a Gewéckels gebueden.

Jamie Reinert / tt

21-11-02 715Voka Gentle (Hannah Sommer).jpg
Voka Gentle. Foto: Hannah Sommer

Eng Panoplie vu Kläng ass op dëser Welt ze fannen. An d'Welt ass der englescher Band "Voka Gentle" hir Auster. En Trio, d'Zwillingen Ellie and Imogen Mason an de William J. Stokes, déi zanter e puer Joer zesummen experimentéieren. Dräi Singer-Songwriteren, Multi-Instrumentalisten, Produzenten déi nawell gäre komesch Téin an hir Kompositiounen integréieren.

Ob et e Gletscher ass dee kraacht, Pneuen déi quiitschen oder Villercher déi sangen, am Hannergrond lungeren iwwerraschend Geräischer déi drop waarden entdeckt ze ginn. Der Band hir Konscht Pop Musek hëlt sech vill Fräiheeten, bleift awer trotzdeem direkt an op de Punkt.

Exzentrizitéit gëtt stolz presentéiert

D'Musek vu "Voka Gentle" ass räich un Aflëss. Op hirem neie 60-Minutten Opus flitt een an engem Otemzuch vun Avant-Garde, Synth-Pop, elektronescher Musek, eriwwer op Indie a Folk. Si sinn eng brittesch Band, déi hir Exzentrizitéit mat Stolz virweist. Radiohead, Tunng, Richard Dawson, Brian Eno sinn nëmmen e puer Nimm, déi engem an deem Zesummenhang an de Kapp kommen.

Op "WRITHING!" sange se mat Humor iwwer Optimiséierung, iwwerflësseg Technologien an den Drang, Routinnen ze briechen. Si kucken dobäi virun allem gären erop, an d'Firmament. Als Astronaut gëtt an d'Onbekannt gebléckt. Als Tuermfallek schwieft ee souverän an der Loft. Esouguer de Wayne Coyne, de Frontman vun de Flaming Lips ass op engem Titel ze héieren, deem seng epesch Theatralik an dëser Band vu London e schéint Doheem fënnt.

Mat Momenter gëtt ee bal vun deem ganze musikalesche Gefréckels iwwerwältegt. An dach fléisst e roude Fuedem duerch déi 14 Stécker op "WRITHING!". "Voka Gentle" brécht weiderhin Dualitéiten. Tëscht Harmonie an Dissonanz, Rou a Stuerm, subtil a graff gëtt sech amusant ausgedréckt. Hiren neien Album hält d'Kontradiktiounen, d'Frustratioune vum agespaart sinn, vun eiser Gesellschaft fest a mécht draus en eben zimmlech chaoteschen Amalgamm. E komesche Misch-Masch vu musikaleschen Iddien, wou wëll Samples op ominéis Bass-Linnen, versate Beats op verdreemten Harmonien treffen. Alles ass erlaabt.

An der Mediathéik:

Album vun der Woch / / Jamie Reinert
Lauschteren

Méi zum Thema

The Disliked
FËNNEFVÉIEREL

Ongefiltert Ablécker an de kreative Prozess vu Lëtzebuerger Bands, MusekerInnen: an der Kulturfabrik prouwen niewent ville Metalbands och d'Jonge vun The Disliked.

Princess Century
Princess Century - s u r r e n d e r

Ënner dem Pseudonym "Princess Century" huet d'Musekerin Maya Postepski hiren drëtten Disk erausbruecht. Op dësem séngt si och fir d'éischte Kéier selwer. Een immens introspektiven Album, fënnt d'Vicky Stoll.

NBLR.jpeg
NBLR

Op der éischter Single vum neie Lëtzebuerger Duo NBLR gëtt sech haart ameséiert. Zwee Post-Rock Kolleege hu sech wärend der Pandemie mat verstréckte Loops beschäftegt, an hunn hirt Gléck fonnt.

Jackie Moontan
Nei EP: Jackie Moontan – The Longest Sunday in History

Den Jackie Moontan ass een Entertainer, dee vum Mount gefall ass. Am Lockdown hunn de Jérôme Klein an de Pol Belardi mat der Musek gehollef, elo ass schonns en Nofollgeralbum an der Këscht.

Net verpassen

Programm

Dossieren

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

  • Dossier: Cannabis-Legalisatioun

    Nach am Laf vun dësem Joer soll e legale Kader ausgeschafft ginn, fir e staatlech kontrolléierten Ubau vu Cannabis fir medezinesch Zwecker zu Lëtzebuerg méiglech ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen