Philharmoneschen Orchester "De Klang vum Orchester huet changéiert"

Den OPL war den 20. Januar zu Wien am Konzerthaus fir e Concert - een "intensiven" Optrëtt, seet de Gustavo Gimeno. Am Interview beschreift de Chefdirigent d'Entwécklung, déi den Orchester ënner senger Leedung gemaach huet.

Manuel Ribeiro / po

Gustavo Gimeno
(Foto: © Lukas Beck)

Fir d'lescht war den OPL am Juni 2015 mam deemolege Dirigent den Emmanuel Krivine zu Wien. Annerhalleft Joer méi spéit war den Orchester mam aktuelle Chef de Gustavo Gimeno an nees am Konzerthaus. Mat engem Programm, dee kuerz virdrun um Kierchbierg an der Philharmonie virgestallt gi war: D'"Pavane pour une infante défunte" vum Maurice Ravel, den zweete Concerto fir Gei vum Shostakovich, an de "Sacre du printemps" vum Stravinsky.

Volle Programm, iwwerzeegend Performance

Fir den Optakt ass d'Pavane keen einfacht Stéck. Besonnesch fir de Cor-Solo, deen direkt am staarken Aigu muss ufänken. Am Allgemengen huet de Gustavo Gimeno hei eng schlicht Interpretatioun geliwwert. Den Orchester konnt trotzdem mat enger schéiner, waarmer Klangfaarf beandrocken.

An der Suite war den zweete Geieconcerto vum Shostakovich du méi melancholesch an dramatesch. De Shostakovich huet dëst Stéck Enn 1967 geschriwwen also kuerz viru sengem Doud. De Concerto erënnert un e Wanderer an engem frieme Land, dee ronderëm sech just Misär gesäit. Fir dës laang Lamentatioun war de Sergeï Khachatryan op der Gei deen idealen Interpret.

Spéitstens beim Stravinski sengem "Sacre du Printemps" huet een den Orchester quasi net méi erëm erkannt. Ënnert dem Emmanuel Krivine huet den Ensembel sech éischter bescheiden a senger Spillweis gewisen. Mëttlerweil schéngt den Orchester sech mat all senge Kontraster z'entfalen: Sief et an der Dynamik, an den Akzenter, oder dem Equiliber tëscht de verschiddene Registeren.

Den armenesche Geiist Sergeï Khachatryan (Foto: © Lukas Beck)

Interview Gimeno

Déi dynamesch an extrem präzis Direktioun vum Gustavo Gimeno deet dem Orchester gutt. An der Spillweis, der Klangform, mee och am Engagement vun de Museker. Et mierkt een, datt d’Memberen vum OPL gären ënnert dem Gimeno spillen a sech matrappe loossen. A genee dëse Fonken spréngt op de Publikum, dee mat engem waarmen a laangen Applaus den OPL zum "Bis" beweege konnt.

De Spuenier ass zënter der Saison 2015/2016 Chefdirigent vum OPL. Zënterhier hätt d'Klangfaarw vum Orchester sech scho verännert, mengt hien. Mëttlerweil wier et ee Klang, deen ee besser erëm erkennt. "Et geet an d'Richtung, déi ech mir virstellen: Een transparente, relaxe Klang vu Qualitéit."

De Gustavo Gimeno hofft, datt den Orchester weider u senger Flexibilitéit fir verschidde Repertoirë schafft: "Wann ee Schubert, Stravinsky oder Mahler spillt, ass all Kéiers een anere Klang gefuerdert an eng aner Manéier ze spillen."

Gustavo Gimeno

"Eng waarmhäerzeg Atmosphär"

De Sergeï Khachatryan huet scho mam OPL zesumme geschafft. Fir hie wier déi Zesummenaarbecht ëmmer ganz agreabel, esou den armenesche Geiist. Mee elo huet hien éischte Kéier ënnert der Direktioun vum "Maestro Gimeno" gespillt.

Den zweete Geieconcerto vum Shostakovich wier awer fir déi ganz Equipe eng nei Entdeckung gewiecht, dat Stéck hätt den OPL bis elo nach ni gespillt. Dowéinst wier et ee méi laange Prozess an deem een hei dra wier. D'Stéck géif mat den Optrëtter méi räif ginn.

Sergeï Khachatryan

An der Mediathéik:

Classic Moment / / Manuel Ribeiro
Lauschteren

Méi zum Thema

elbphilharmonie.jpg
Architektur a Musek

No zéng Joer Bauzäit feiert d'Elbphilharmonie elo hir Ouverture. De Redakter Fränz Kremer an de Regisseur Dan Tanson kënnen d'Gebai a seng Akustik aus éischter Hand beschreiwen.

OPL a Spuenien
Klassesch Musek

De Philharmoneschen Orchester Lëtzebuerg ass op Spuenien-Tournée. Den Ufank mécht ee Concert am Auditorio Nacional zu Madrid. Mir ware bei de Prouwen derbäi. Ee Bléck hannert d'Kulissen.

Net verpassen

Dossieren

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen