Showcase Festival De Maz vertrëtt Lëtzebuerg um Eurosonic

De Maz vertrëtt Lëtzebuerg am Januar beim Eurosonic Festival, dat op Invitatioun vum radio 100,7. Et ass dee gréissten europäesche Showcase Festival. D'Museksbranche trëfft sech all Joer an der hollännescher Stad Groningen, fir nei Talenter ze entdecken. Den Optrëtt kënnt zu engem wichtege Moment am Maz senger Karriär.

Jamie Reinert / sam

Maz
De Maz. Foto: Marie Romanova

"De Schluss vum Ufank vu menger Karriär", esou beschreift de Maz seng aktuell Stëmmung. Seng Musek géing elo an eng nei an nach méi seriö Phase erakommen.

E potentiellt Sprangbriet fir eng international Karriär

Den Optrëtt um Eurosonic kéint e Sprangbriet sinn, a seng Karriär op internationalem Niveau ze lancéieren:

"Et bedeit mir mega vill. Jiddereen an der Museksindustrie weess, datt dat do en immens wichtege Gig ass. Jidderee probéiert dohinzekommen fir gréisser Opportunitéiten ze kréien, fir déi richteg Leit kennenzeléieren."

Mat der Pandemie wier zwee Joer Sendepaus gewiescht. Dëst Joer wier dogéint e ganz gutt Joer fir de Maz gewiescht: "Saachen, un deenen ech déi lescht Jore geschafft hunn, déi fänken elo u sech ze bestätegen", esou de Rapper.

Positiv Opreegung fir de Festival am Januar

Obwuel de Festival nach e puer Méint ewech ass, géingen d'Nerven scho liicht kribbelen: "Wat gutt ass, ass dass ech virdrun nach eng kleng Tour spillen, mech also gutt ka waarm spillen an nach Zäit hunn fir mech ze preparéieren."

Suerge géing hie sech net fir de Concert maachen, d'Opreegung wier positiv.

Mat sengem dynamesche Live-Set zesumme mat sengem Kolleeg an Drummer Rick, huet de Maz dëst Joer fir vill Opmierksamkeet gesuergt. Doriwwer eraus soll an noer Zukunft eng nei EP an eenzele Singelen verëffentlecht ginn.

Neien Album kënnt d'nächst Joer

De Maz wier den Ament amgaang, ganz vill verschidde Stiler auszeprobéieren:

"Heiansdo ass et e bësse méi haart, heiansdo méi soft, heiansdo méi gefillsvoll, heiansdo méi lässeg. Ech freeë mech dat der Welt a menge Fans ze weisen".

En neien Album wier och an der Maach, deen d'nächst Joer erauskomme soll.

Als Member vun der European Broadcasting Union ass de radio 100,7 um Festival bedeelegt. All Joer designéiert d'Museksredaktioun eng Band oder Solo-Artist:in, déi beim Eurosonic kënnen optrieden.

De Festival leeft tëscht dem 18 an 21 Januar 2023 zu Groningen.

Méi zum Thema

The Cool Greenhouse - Eurosonic
The Next Big Thing?

Beim Eurosonic sichen d'Festivalen all Joer am Januar no neien Talenter an de Beräicher am Pop a Rock. D'Editioun 2021 war reng digital. Hei sinn déi wichtegst Nimm an hir Live-Sessions am Video.

Eurosonic Festival 2020
Musek

Den Eurosonic Festival ass wéi eng grouss Foire fir nei alternativ Musek. Iwwer 340 verschidden Artisten a Bands trieden a véier Deeg op, an iwwer 4.000 Professioneller aus der Branche komme kucke fir déi Talenter ze entdecken.

Net verpassen

Dossieren

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen