"Schwarzer September war den Numm vun der Terrororganisatioun, déi 1972 d'Attentat op israelesch Sportler bei den Olympesche Spiller zu München duerchgeféiert huet. Den Numm baséiert op den Ufank vum jordanesche Biergerkrich, deen den 1. September 1970 ugefaangen hat, nodeem radikal Palestinenser en Attentat op de jordanesche Kinnek Hussein ausgeüübt hunn.
Den Sherko Fatah schwätzt a sengem Roman net vum Münchener Attentat, mee vun der Organisatioun, déi dohannert stoung.
Et begleet een déi eenzel Protagonisten op hirem Wee zu der Gruppéierung, an den interessantste Personnage ass de Ziad. E jonke Libanes, dee sengem Papp Sue klaut fir a Frankräich ze flüchten. Zu Marseille ukomm, kënnt hien awer net wäit mat senge Suen, hie schléift op der Strooss bis hien e schlecht bezuelten Job an engem Restaurant kritt, wou hien da vun de "richtege" Leit ugeschwat gëtt.
Den Ziad ass ee vun de klenge Leit, een dee benotzt an agesat gëtt, een dee geaffert gëtt, an deen net aus iergendwellechem Idealismus handelt, mee aus enger Naivitéit, Aarmut, Solitude a Sich no Unerkennung.
Vermëschung vu reellen Evenementer a fiktive Personnagen
Den Ziad soll e schrëftlechen Test ausfëllen, all Nimm a Situatiounen opschreiwen, déi wichteg a sengem Liewe waren a wärend dësem Test erënnert sech de Ziad u säi jonkt Liewen a léist d'Lieserinnen a Lieser hien op dësem Wee begleeden.
Änlech ergeet et engem Grupp vun Däitschen. Do ass Theresa, dat dem biedere Liewe vu sengen Elteren, senger geuerdenter Kandheet an dem langweilegen Duerf de Réck kéiert an zu Berlin studéiert, iwwerzeegt vu lénken Gedanken an op enger Manif den Alexander kenneléiert ... och si kommen, wéi den Ziad, an en Ausbildungslager an do gëtt et dann och keen Zeréck méi.
Da ginn et awer och déi, déi d'Fiedem zéien, net just op der arabescher Säit, mee och op der amerikanescher.
De Sherko Fatah vermëscht déi reell Evenementer, déi an den ufanks 70er Joren geschitt sinn, mat fiktive Personnagen. Just déi bekannten Nimm, wéi den Al Hassan Salameh, dee mam Codenumm Abu Hassam de Schwaarze September geleet huet, sinn tatsächlech Protagonisten, och an dësem Roman.
Wat dëst Wierk esou besonnesch mécht, ass datt den Sherko Fatah no Äntwerte sicht, wéi gëtt een Terrorist, wéi eng Zufäll kënnen zu esou enger Decisioun féieren, och bei Mënschen, déi alles anescht wéi gewaltbereet sinn.
En informatiivt Buch an e literaresche Genoss
Ënnermoolt ginn déi Decisiounen, andeem de Fatah och d'Bannen- an d'Baussebild vun den Awunner vum Libanon wéist. Wéi fillt sech e Mënsch, deen do lieft an op eemol decidéieren anerer, mat engem ganz anere reliéisen, kulturellen, sozialen an och sproochleche Hannergrond iwwer een?
Do läit wuel dem Auteur seng Stäerkt. E Polit-Thriller ze schreiwen, deen detailléiert op déi eenzel Protagonisten ageet, op Heldentum a Schwaarz-Wäiss-Molerei verzicht, an dat och nach sproochlech perfekt meeschtert. Et ass en Danz duerch all déi verwurrelt, dramatesch a komplex Entwécklungen, de Fatah zeechent seng Figuren immens iwwerzeegend, hält si awer op Distanz, wat ebe verhënnert, datt een iergendwellech Gefiller fir déi verschidden a ganz ënnerschiddlech Gestalte kritt. Eng Zort Sachbuch, mee duerch déi staark Sprooch, déi dacks poetesch Zich unhëlt, dann awer ganz pointéiert a pragmatesch ass, ass "Schwarzer September" net just en informatiivt Buch, mee virun allem och e literaresche Genoss.