Direkt mat hirem éischten Album "Le Goût du paradis" hat d'Virginie "Nine" Antico 2008 den Duerchbroch an der Welt vun der BD gepackt. Zënter deem gëtt am Milieu genee verfollegt wat si esou verëffentlecht, sief et als Zeechnerin, sief et als Zeenaristin ("Il était deux fois Arthur", zesumme mam Grégoire Carlé).
Tëschenduerch realiséiert d'Nine Antico och scho mol e Film wéi "Playlist" (2021). An där romantescher Komedie a schwaarz-wäiss geet et ëm eng jonk Fra, déi eng Karriär... an der Bande dessinée ustrieft.
Agata, Lucia a Rosalia
Der Nine Antico hir lescht Graphic novel "Madones et putains" setzt dräi Fraen an Zeen, déi dat grad net sinn: Madonnaen an Houeren. Mee als solch goufen se am ganz kathouleschen Italien am Laf vum 20. Joerhonnert behandelt, d'Agata, d'Lucia an d'Rosalia - dräi Virnimm vun Helleger...
Op der rezenter Foire du livre zu Bréissel hu mer d'Nine Antico ë.a. gefrot, wéi ee mat engem Rock-Background op esou eng Thematik kënnt, wat ee mat der Bande dessinée anescht kann ausdrécke wéi mam Film, oder nach firwat sech rezent feministesch Filmer sou dacks op d'Vergaangenheet beruffen.
