Foto-Audio-Installatioun D'Marina Smorodinova verdeelt Stärestëbs

D'Kënschtlerin Marina Smorodinova, Joergang 1988, lieft a schafft zu Metz an zu Paräis. Déi gebierteg Russin war 2017 fir d'Triennale de la jeune création an de Rotondë selektionéiert ginn. Fir hir Foto-Audio-Installatioun war si am Virfeld der Fro nogaangen, wéi d'Mënsche weltwäit hire Rapport zu hirer Stad gesinn. Sozial Interaktioune si bis haut e wichtege Sujet fir d'Kënschtlerin. Als eng Aart Prolog fir déi fënneft Triennale de la jeune création presentéiert d'Marina Smorodinova aktuell de Video "Du corps et du ciel" an der Buvette vun de Rotonden.

Kerstin Thalau / cbi

Triennials: Vernissage
Foto: Mike Zenari

Fir d'Marina Smorodinova joe mir därmoosse gestresst enger Zort "UrKnall", "UrKnaller", "Ur-Knuppert" no, also: der legendärer Äntwert op all Froen, der erfëllter Karriär, dem ultimative Kick, datt mir dat sougenannt Banaalt verkennen.

Déi zu Sankt Petersburg ausgebilt Molerin an a Frankräich geléiert Realisatrice bitt dem Alldag hir wäertvollst Plattform an hire Mixed-Media-Aarbechten. Zum Beispill am Clip "communautaire", fir dee si sech fir ganz ënnerschiddlech Wunngemeinschaften a Russland an a Frankräich interesséiert huet, Zäit bei de Leit verbruecht huet, esouguer e russescht Fotoarchiv zum Theema fonnt huet, fir um Enn eng Animatioun aus eegene Molereien, Foto- a Filmmaterial zesummenzesetzen.

Ee Kierper aus Stärestëbs

Den neie Video "Du corps et du ciel" gouf speziell fir d'Rotondë kreéiert. Um iwwerdimensionalen Ecran iwwer dem Buvette-Bar leeft e bis Enn Mee als Loop, en Boucle. Och hei huet d'Kënschtlerin mat Molerei, Dessin animé a Filmopname geschafft.

Et goung hir dorëms, d'Geschicht vun enger Persoun ze zielen, déi sech reegelméisseg vun der Gesellschaft ofkapselt, fir de Stärenhimmel ze observéieren. Ënner dem Firmament huet si d'Gefill, Deel vun eppes méi Groussem ze sinn, datt hire Kierper am Fong net aus Organer a Schanken, mee aus Stärestëbs besteet. Dës abstrakt Iwwerleeung ka si mat hirem Entourage net deelen.

D'Marina Smorodinova. Foto: Mike Zenari

Esouvill In-halt, Ge-halt ... an engem Video fir e Café ...? Fir d'Marina Smorodinova handelt et sech dobäi vläicht net ëm déi ideal - mee dach ëm eng gutt Plaz - fir sech iwwer Konscht auszetauschen. Dowéinst huet si och gären nach emol mat de Rotonden zesummegeschafft; d'Triennale hat si a super Erënnerung.

D'Marina Smorodinova weess instinktiv, wat si mat hirer Konscht ausdrécken, wat fir Iddie si deele wëllt. Vu datt zwou Kulturen an hirem Häerz an an hirem Kapp wunnen, huet si just heiansdo Zweiwel, ob, respektiv wou, hir Metaphere verstane ginn.

Tëschent zwou Kulturen

Mee si huet geléiert, datt et keng Léisung ass, et jiddwerengem gerecht maachen ze wëllen. Datt si mëttlerweil scho ganz gutt mat universellem a lokalem Input jongléieren, Leit beréiere kann. Aktuell pendelt d'Kënschtlerin, déi deemnächst Mamm gëtt, tëschent Metz, Paräis an heiansdo Russland.

Mee am léifste géif si hir Zäit tëschent béide Länner a Kulture méi gläichméisseg opdeelen. Dat wier just méiglech, wa si och aus Stärestëbs wier. An awer gëtt et en neie Projet an der Regioun Altai, also am Grenzgebitt tëschent Russland, der Mongolei a China. Fir Oktober 2020 ass schonn eng éischt Altai-Projektioun programméiert. Mir wäerten d'Stärekonstellatiounen an de Stärestëbs am A behalen.

An der Mediathéik:

Kultur / / Kerstin Thalau
Lauschteren

Méi zum Thema

Schirn
Ausstellung

Die Ausstellung "Fantastische Frauen" präsentiert bekannte und weniger bekannte Künstlerinnen, die der surrealistischen Bewegung angehörten. Angelika Thomé hat die Ausstellung besucht.

"The perceiving body" am Mudam 3
"The Perceiving Body" am Mudam

D'Konschtstiler Minimalismus oder Land-Art hu beim breede Public net wierklech breede Succès. D'Ekipp vum Mudam huet decidéiert, Vertrieder vum Minimalismus, wéi den Amerikaner Robert Morris, dem breede Public méi bekannt ze maachen.

Installation view of Meet Vincent van Gogh. Image courtesy of Meet Vincent van Gogh. Meet Vincent van Gogh, 7 February 2020 - 21 May 2020, Upper Ground, London, meetvincent.co.uk
Expo

L'exposition Meet Vincent Van Gogh Experience ouvre ses portes aujourd'hui à Londres. Une exposition multi sensorielle dont l'objectif est de mieux connaître l'homme derrière l'artiste, avec un résultat mitigé.

Eieiei
Märecher

Wien denkt, Märercher wieren almoudesch oder all d'selwecht: d'Luisa Bevilacqua léisst an de Rotondë mam Objetstheater "EI, EI, EI?!" déi al Traditioun vun der Erzielkonscht nei opliewen.

Programm

Praktesch Infoen

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen