Wéi kënne mir op eng einfach a flott Fassong Fësch an eng gesond Ernärung abauen?
Wéi wäertvoll Fësch a Mieresfriichten an enger gesonder Ernärung sinn, hu mir an de leschten Episode gesinn. Mee wéi kënne mir se op eng gesond Manéier einfach a séier zoubereeden, woubäi natierlech de Pleséier um Fëschiessen net dierf feelen.
Gekacht gëtt mat der Ernärunsgberoderin Lis Muller:
"Fir datt de Fësch seng wäertvoll Inhaltsstoffer beim Zoubereede behält, muss een oppassen, wéi eng Method een uwennt. Wann Dir déifgefruere Fësch verschafft, da loosst e fir d‘éischt entdeeën. Platen bei deenen d’Närstoffer vum Fësch maximal erhale bleiwen, sinn déi an der Papillotte oder gedämpt zoubereet a mat Kraider wéi z. B. Estragon, Dëll gewierzt.
Fir um Barbecue eegent sech Thon, Saumon oder Scampien aus nohaltegem Bestand, als Steak gegrillt oder Scampie mat Knuewelek a Péiterséileg marinéiert op engem Spiiss mat Peffer, Olivenueleg an Zitroun, e bësse Salz Rosmarin oder Thymian wierzen.
Wann Dir Fëschreschter hutt, kënnen déi ganz gutt an engem Fëschgratin mat Tomaten a Fenchel, enger Fëschzopp mat Rouille, enger Quiche mat Poretten oder engem Wok mat Fësch an asiatesche Gewierzer verschafft ginn.
An der kaler Summerkiche ka Fësch gutt amplaz vu Fleesch zoubereet ginn. Thon au naturel an enger Salade niçoise, gereechert Makréil am Ganzen oder als Rillette a mat gemixte Réidercher a Jughurt vermëscht, oder eng gereechert Frell. Ganz beléift sinn och Fëschhamburger mat enger gemëschten Zalot."
Referenzen:
Ducasse, A., & Neyrot, P. (2011) Nature simple, sain et bon Mers et océans pêche responsable. Alain Ducasse
Orieux, G. (2025). Cuisiner la mer - Editions de la Martinière.
Santé, C. S. (2025, juin 17) https://www.hgr-css.be/fr/avis/9805-9807/recommandations-alimentaires-pour-la-population-belge-2025
