Wat ass eng Alerte, wéi funktionéieren déi Kontrollen an de Betriber vun de Liewensmëttelketten a wéi soll de Konsument domadder ëmgoen?
An Europa gëtt et e ganz héijen Niveau vu Liewensmëttelsécherheet. Duerch den EU-Bannemaart goufen déi lescht 30 Joer eng ganz Rei EU-Reglementatioune geholl, déi all Typpe vu Geforen an de Liewensmëttel an och de Fuddermëttel reglementéieren. Am Beräich vun de Liewensmëttel sinn dës Texter zu Lëtzebuerg duerch d’Liewensmëttelgesetz vun 2018 ëmgesat (an nach aner sektoriell Gesetzer).
Dës Gesetzer verflichte Betriber vun de Liewensmëttelkette sécherzestellen, datt se just Produiten op de Maart setzen, déi konform sinn an esou keng Gefor fir Gesondheet vu Mënsch an Déier duerstellen.
"Liewensmëttel waren nach ni esou sécher wéi haut."
Parallel dozou organiséieren EU-Member-Staaten an och Lëtzebuerg offiziell Kontrolle fir ze iwwerwaachen, datt Betriber hire Verpflichtungen nokommen.
Zu Lëtzebuerg ass dat d’ALVA, déi 2022 aus dem Zesummeleeë vun der Veterinärsverwaltung, der Sécurité alimentaire vun der Santé, dem Commissariat alimentaire an der Fuddermëttel-Kontroll entstanen ass. 2025 koum nach de Liewensmëttellabo aus dem LNS dobäi.
D’ALVA huet zu Lëtzebuerg zesumme mat der ASTA 20 Kontrollsystemer opgestallt déi sécherstellen, datt all d’Aspekter vum Liewensmëttelrecht agehale ginn.
"Wichteg fir de Konsument, dee soll ëmmer genee kucken, wéi eng Lousnummer oder Haltbarkeetsdatume concernéiert sinn."
Explikatioune vum Patrick Hau, Directeur-adjoint vun der ALVA, der Administration luxembourgeoise vétérinaire et alimentaire
https://www.LU-alert.lu
https://lu-alert.lu/fr/recommandations-prevention/conseils-comportement/sante.html
https://www.securite-alimentaire.lu
https://securite-alimentaire.public.lu/fr/support/doleances.html
