E grousse bloe Camion am Schoulhaff oder vläit hunn d’Kanner Iech scho mol dervun erzielt, wa si aus der Schoul heem kommen, abee: dee bloe grousse Camion ass de Science Mobil vum natur musée an dee stelle mir hei vir.
Am Ganzen huet den natur musée zwee grouss Camionen, een dovunner ass de Science Mobil. Dee fiert schonn zënter méi wéi 20 Joer duerch d’Lëtzebuerger Land a mécht bei de Schoulen Halt.
Do gëtt hien zu engem grousse Sall ausernee geklappt mat all deem pedagogesche Material, dat ee brauch, fir d’Schüler:innen op eng flott an interaktiv Aart a Weis d’Theema Evolutioun erliewen ze loossen.
Ob mir eis op d’Sich nom éischten Tetrapod maachen, Déieren entdecken, déi sech duerch Konvergenz z. B. gläichen oder d’Entstoe vu verschiddenen Déierenaarten erzielen, all d’Theeme vum Science Mobil hu genee esou wéi déi vum natur musée eng Verbindung zur Evolutioun vun Déieren a Planzen.
Ouni de wäite Wee bis an d’Stad mussen ze goen, entdecken esou d‘Schüler:innen e Stéck natur musée an hirem Schoulhaff.
Explikatioune vun der Aline Fischer a Sandrine Amann, Responsabel vum Science Mobil
