Sief et gréngen, rouden, wäissen, gekrauselten oder spatze Kabes, ouni Brockelcher, Brokkoli, a Kolrawen ze vergiessen, si si besonnesch an der kaler Joreszäit beléifte Kabeszorten op eisem Teller.
Fréier ware se besonnesch wäertvoll fir de Vitaminn-Bedarf am Wanter ze décken. Sauerkraut gouf viru Joerhonnerte besonnesch op däitsche Schëffer giess, fir de Skorbut, eng Mangelerkrankung u Vitaminn C, ze verhënneren. Haut si virun allem dem Kabes seng antioxydativ an entzündungshemmend Wierkstoffer bekannt. Fir eng besser Verdauung kann ee gäre Kümmel oder Fenchel gebrauchen.
Rezept Iddien:
- Fir wäertvoll Närstoffer ze erhalen, kann e wäisse Kabes reng geschnidden, zesumme mat gerappte Wuerzelen als knackeg Cruditéit genéissen - hei kann ee wéineg Mayonnaise mat Brach verréieren, mat Moschter a Kraider verfeineren an esou eng méi liicht Coleslaw preparéieren.
- Brokkoli eegent sech ganz gutt fir ze dämpen, esou bleiwen d'Mineralien am Geméis erhalen. Hei net vergiessen de Stronk mat ze verschaffen; einfach schielen a kleng schneiden huet en en delikaten Anäisgeschmaach. Zu Brokkoli passe ganz gutt geréischtert Pinien oder gehackte Mandelen.
- Choucroute schmaacht ganz gutt mat Püree, Fësch, marinéiertem Pouletsfleesch oder Mignon; eng liicht alternativ zu der traditioneller Choucroute, déi Plaz an der gesonder Kiche fënnt. De Rescht Choucroute mam Püree schmaacht als Tierteg den Dag drop nach besser.
- Ganz beléift si Kabesrouladen an der vegetarescher Kichen. Hei gi grouss Kabesblieder blanchéiert an da mat enger Farce vun z. B. Bulgur, Champignon, Ricotta, Kraider gefëllt, zu enger Roulade zesummegeschloen an am Schäffche goen gelooss.
- Kabeszoppen hate mol vill Unhänger, wéi se als Wonnerzopp op de Regimmsmarché koumen. Si bleiwen, wéi all Zoppen, flott Zoubereedunge fir den Wanter: eng gutt Manéier déi néideg Flëssegkeet ze kréien, wiermen den Dag iwwer a bréngen zousätzlech e Cocktail vu Vitaminnen a Mineralien.
Referencen:
Bown, D. (2001): DuMont's Große Kräuter-Enzyklopädie RHS Encyclopedia of Herbs & their Uses - DuMont
Lecerf, J.-M. S.-L. (2020): Nutrition préventive et thérapeutique - Elsevier Masson
Nosbusch, T. (s.d.): Aus der Luxemburger Küche - Guy Binsfeld
Vierich T., V. T. (2020): Aroma essenziell - Stiftung Warentest
Zenter fir d'Lëtzebuerger Sprooch (2021): Vun Dréischel bis Kréischel 294 Uebst- a Geméiszorten, Kraider, Gewierzer an Nëss - ZLS a SCRIPT
