Drauwen sinn eng vun den eelsten Uebstzorten, déi eis bekannt sinn, et gëtt se schonn esou laang, datt een net méi richteg novollzéie kann, vu wou se hierkommen.
Laang goufen Drauwen haaptsächlech gebraucht fir Wäin ze maachen, mee lues a lues goufen ëmmer méi Zorte geziicht, déi éischter fir de Konsum geduecht waren, méi séiss, méi eng dënn Haut a méi rezent, och ouni Kären.
Et ass eng interessant Zort vun Uebst, net esou wéinst hirem Gehalt u Vitaminnen, mee éischter wéinst de Planzestoffer, déi si enthalen, an déi als Antioxidanten eng schützend Wierkung op eise Kierper an op d'Entwécklung vu chronesche Krankheeten hunn. An och wa se vill Drauwenzocker enthalen, si sinn trotzdeem keen Tabu fir Leit mat Diabetes.
Rezept Iddien:
Drauwe kann een natierlech einfach esou frësch als Tëschemoolzecht oder Dessert iessen, si passe gutt an eng Uebstzalot, wou een dann och ka mat de Faarwe spillen. Et kann een Drauwen och fir op eng Taart gebrauchen, wéi Kiischten oder Mirabellen. Wann een z. B. mat verschidden Drauweformen a Faarwe spillt, kann ee ganz dekorativ Kreatioune maachen.
Och an Desserte wéi Clafoutien oder Crumble loosse sech Drauwe gutt verschaffen, an agekacht, als Gebeess oder Chutney, kënne si ganz villsäiteg agesat ginn.
Drauwen eegene sech awer och ganz gutt fir bei méi gehäerzte Liewensmëttel giess ze ginn, wéi z. B. bei engem Kéisplateau, réi Ham oder Paté. Si passe gutt a Rezepter mat wäissem Fleesch, wéi Gefligel, Hues oder Schwäin, wou si dann eng séiss/saierlech Nout ginn.
Gedréchent als Rosénge kann ee se z. B. am Müsli iessen oder am Couscous. Zesumme mat Äppel an enger Taart oder engem Strudel verschaffen an natierlech net ze vergiessen am Kiermeskuch oder am Chrëschtdagsstollen.
Informatioune mat der Dieteticiene Sylvie Paquet
Referenzen:
www.diabetes-news.de - Lebensmittelkunde Weintrauben
eatsmarter.de
Le raisin : l'automne en grappes
