D'Ana Pinto huet 2002 ee Mann kennegeléiert, dee wéi e charmante Prënz op si gewierkt huet. D'Magie huet net laang ugehalen. Wat mat psychescher Gewalt ugefaangen huet, ass séier a physesch Gewalt iwwergaangen. Si gouf geschloen, mëssbraucht, manipuléiert an isoléiert, bis hiren Täter si Spidols-räif geschloen huet, a si enges Nuets mat hirem Jong vun dräi Joer fortgelaf ass. Dat war 2011. Dunn ass ee laangen a penibele juristesche Wee lassgaangen. D'Scheedung gouf eréischt 2019 gesprach, a si kämpft nach fir den Ënnerhalt um Geriicht.
Hir Geschicht vu Gewalt a Mëssbrauch huet een Däiwelskrees erginn, aus deem d'Ana Pinto nëmme schwéier erauskoum. Hiren Ex-Mann gouf an drëtter Instanz zu enger Geldstrof verurteelt, d'Prozedur huet sechs Joer gedauert. Sechs laang Joren, deen Delai misst der Ana Pinto no onbedéngt verkierzt ginn.
Si ass elo amgaang mat anere fréieren Affer eng Associatioun ze grënnen, déi als Zil huet betraffene Leit ze hëllefen an hinnen e Matsproocherecht soll ginn. Si wëllen als Affer gefrot ginn, wa politesch oder juristesch Reforme gemaach ginn. D'Associatioun La Voix des Survivant(e)s wëllt op Problemer opmierksam maachen, mee och eng Ulafstell bidde fir Persounen, déi vu Gewalt betraff sinn. Zesummen hätt ee méi Gewiicht, et géif ee sech nämlech dacks eleng fillen, an et wéisst een net, wouhinner oder wat maachen. Et wéilt een och benevole Professioneller, wéi Affekoten, mat an d'Boot huelen, fir betraffene Leit konkret kënnen ze hëllefen, zum Beispill och fir eng Plainte ze maachen.
D'Natasha Ehrmann féiert duerch d'Gespréich.
