Uergelmusek, Dirigéieren, Komponéieren: dat sinn déi dräi Pilieren, op déi dem Pierre Nimax Jr. säi musikalescht Liewen - oder iwwerhaapt säi Liewen - opgebaut ass.
De Pierre Nimax Junior schafft als Professer fir Kierchemusek an Uergel am Stater Conservatoire. Hien ass als Uergelsolist vill gefrot a komponéiert fir d'Uergel an Chouer.
1993 gouf de Bouwechouer Pueri Cantores gegrënnt, feiert also geschwënn säin 30. Anniversaire. Responsabel fir de Chouer, deen haut en Deel vum Stater Conservatoire ass, ass zanter dem Ufank de Pierre Nimax a seng Fra d'Marie-Reine Nimax-Weirig.
Musek huet dozou gehéiert
Wann de Pierre Nimax elo zeréckdenkt, da war an ass Musek bei hinnen eppes ganz Normales. Wéi aner Leit spadséiere ginn oder an d'Vakanz fueren, gouf bei der Famill Nimax musizéiert. Seng Schwëster, seng Mamm, säi Papp, déi zwee Grousspäpp an och d'Monnien hunn alleguerte Musek gemaach
"Musek maachen ass einfach eng Form vu Kommunikatioun, vu Spaass, haut huet ee vläicht eng Playstation, wou een domat spillt, mir haten e Piano, herno hate mer eng Uergel, wou een domat gespillt huet. An de Begrëff "Spillen" ass jo e schéine Begrëff. (..) De Spaassfaktor ass wichteg, d'Erliefnis ass wichteg, d'Entdecke vu Saachen ass wichteg, dat geet dann iwwer d'Ouer, de Bauch a gottseidank ass de Repertoire vun der Musek esou riseg."
Bei deem Ganzen ass awer och ëmmer Zäit bliwwen: wat ee jo als Kand gär mécht, fir op d'Beem ze klammen.
"Op jiddwer Fall, spillen a spillen a spillen. Et ass ee gudde Mix vun deem, wat kreativ ass. Well et muss een d'Kreativitéit fërderen andeems ee kuckt, wat beim Kand méi déif sëtzt a wat manner déif sëtzt."
"Wann d'Kanner vun de Kanner vun de Kanner kommen"
De Pierre Nimax Jr. ass zanter 30 Joer, zanter der Grënnung, Matresponsabel fir de Bouwechouer Pueri Cantores. Et ass schonn eng Freed, wann een no där laanger Zäit gesäit, datt den Interessi nach ëmmer do ass, an datt ewell schonn d'Kanner vun deenen, wou virun drësseg Joer ugefaangen hunn, am Chouer derbäi sinn.
"Dat sinn elo d'Bouwe vun de Bouwen. Do sot och den Heinz Hennig (Grënner vum Knabenchor Hannover) ëmmer: Wann elo d'Kanner vun de Kanner vun de Kanner do sinn, dann ass et héich Zäit opzehalen. Mee de Kontakt ass ëmmer bliwwen."
