D'Choreografin an Dänzerin Annick Pütz ass Invitée beim Jean Claude Majerus. Et ass besonnesch den zäitgenësseschen Danz, deem hiert Häerz gehéiert. Et geet drëms sech iwwer d'Beweegung matzedeelen, Emotiounen ze transportéieren. A genee dat ass der Annick Pütz wichteg, nämlech op dat risegt Potential hinzeweisen, wéi mir eis iwwer eise Kierper kënne matdeelen. Der Annick Pütz hir Aktivitéite sinn diversifiéiert, si ass och nach Educatrice somatique par le Mouvement, a zertifiéiert am Body-Mind Centering, grad wéi am Toucher somatique biodynamique oder an der Pratique cranio-sacrale.
Schonn als Kand huet d'Annick Pütz sech gären zur Musek beweegt, a wéi si al genuch war fir de Bus eleng an d'Stad ze huelen, konnt si an eng Danzschoul goen. No der Première wollt si dunn awer probéieren den Danz zu hirem Beruff ze maachen, ouni datt et awer kloer war, ob dat kéint goen.
"Ech hunn do ugefaange mat modernem, zäitgenësseschem Danz an ee Joer méi spéit sinn ech op Rotterdam op d'Héichschoul komm an do ass et weidergaangen. (...) Ech ka mech erënneren, ech hu mer et eigentlech ni zougetraut, danzen."
An dat och, well ëmmer gesot gouf, mam Danze muss de fréi ufänken, soss ass et schwéier et als Beruff ze maachen. Bis si dunn e Film vun engem Ausdrocksdänzer, deen Autodidakt war, gesinn huet.
"A wou ech dee Film gesinn hunn, an ech gemierkt hunn, wéi deen Autodidakt, mat wéi enger Energie deen do erugaangen ass. Do hunn ech geduecht, mee dann ass et jo méiglech. An do hunn ech mech getraut, mer d'Fro ze stellen, vläicht kanns du et jo awer maachen."
An erauskoum e Liewe fir Danz a Beweegung.
