Fir jiddwereen, dee Cabaret gären huet, war wuel de Cabarenert iwwer d'Joren eng Referenz hei zu Lëtzebuerg. E war eppes wéi de Spigel vun der politescher a gesellschaftlecher Situatioun zu Lëtzebuerg. Mat derbäi enger ganzer Palett vu Parodië vu Lëtzebuerger Politiker a Perséinlechkeeten. De Rol Gelhausen war vun Ufank un een Deel vum Cabarenert an dat an enger duebeler Funktioun, als Acteur, mee virun allem och als Auteur. An iwwerhaapt ass d'Schreiwe vu kabarettisteschen Texter e Genre, deen dem Rol Gelhausen läit.
D'Wuerzele vun Rol Gelhausen senger Presenz op der Bün leien zu Kanech, wou hien, wéi hie seet, carrement op d'Bün geschleeft gouf. Hien hat deemools fofzéng Joer a wéi op villen Dierfer hunn och zu Kanech déi verschidde Veräiner Theater gespillt. An et huet ëmmer nees u jonke Männer gefeelt. Ee Veräin koum bei de Rol Gelhausen heem schellen, datt hie soll mat spillen, well se nach ee gebraucht hu fir de "Jeune premier" ze spillen.
"Ech hu mech awer iwwerriede gelooss, an ech sinn awer um Ufank bal gestuerwen op der Bün. Dat waren déi éischt Schrëtt, an ech hunn awer gemierkt, datt et eppes Flottes wier. Op enger Bün ze stoen a Reaktiounen an engem Sall auszeléisen, dat gëtt awer ganz séier eng Freed an eng Sucht."
Den Theater goung awer net méi duer
Well de Rol Gelhausen an och anerer praktesch iwwerall an de Veräiner dunn Theater gespillt hunn, koum awer d'Loscht eppes aneschters ze probéieren. An do koum d'Iddi, well hie mol doruechter Cabaret kucke goung, ob dat net e Wee wier.
"An do si mer an déi Richtung gaangen, natierlech um Ufank mat Texter vun den aneren groussen Auteuren zu Lëtzebuerg: Braun, Schuster, Hoscheidt an esou weider, déi mer du geholl hunn. Bis mer do lues a lues ugefaangen hunn eis selwer dohinner ze setzen an Texter zesumme geschriwwen hunn. Dat huet sech ëmmer méi entwéckelt, bis dat awer herno schonn net esou schlecht war."
