Dagdeeglech

Den 19. Februar 1986 schéisst d'Sowjetunioun dat éischt Module vun der Raumstatioun MIR an den Orbit. No de groussen Erfolleger vum éischte Satellit Sputnik, dem éischte Vol am All vun engem Mënsch mam Juri Gagarin an duerno der éischter Fra, hat d'UdSSR d'Renne mat den USA fir den éischte Mënsch um Mound verluer. D'Sowjetunioun huet sech duerno op Experimenter am All konzentréiert an hat mat Saljut 7 eng éischt Statioun am All. D'MIR sollt awer déi éischt Weltraumstatioun sinn, déi aus verschiddene Module opgebaut war. Si huet d'Opléisung vun der Sowjetunioun iwwerlieft a gouf no 15 Joer am Déngscht - eng Liewensdauer vu siwe Joer war am Ufank geplangt - kontrolléiert an d'Äerdatmosphär gesteiert, wou se verbrannt ass. An deene 15 Joer ass d'MIR an enger Héicht vun 390 Kilometer 86.325 Mol ronderëm d'Äerd gekreest.