Dagdeeglech

Haut viru genau 102 gouf mat der Ënnerschrëft vun der Armistice d'Enn vum Éischte Weltkrich festgehal. De Waffestëllstand ass um 11 Auer Moies a Kraaft getrueden. D'Ënnerschreiwe selwer vum Waffestëllstand tëscht den Alliéierten an hirem leschte Géigner, Däitschland, ass awer e puer Stonnen éischter geschitt, kuerz viru 6 Auer Moies, an engem Zuch-Waggon am Bësch vu Compiègne bei Paräis. An de Woche virdru goufen et op der däitscher Säit gréisser Meenungsverschiddenheeten iwwert wat ee sollt maachen, virukämpfen oder engem Cessez-le-Feu zouzestëmmen. Zwee Deeg virum Armistice huet Däitschland esouguer eng Viraussetzung vum amerikanesche Präsident Woodrow Wilson ugeholl, déi een e puer Méint méi fréi fir inacceptabel fonnt hätt, nämlech d'Ofdanke vum Keeser Wilhelm dem Zweeten. Dowéinst huet déi däitsch Delegatioun och gemengt si kéint deen Dag en Accord aushandelen, ënnert deem och si net all ze schlecht ewechkéimen, mee am Waggon zu Compiègne hunn se séier gemierkt, dass d'Konditioune vum Waffestëllstand immens strikt waren a quasi nëmmen zu Laaschte vun Däitschland. Mee den Drock ass ëmmer méi gewuess, an wéi den 10. November den Ieweschte Kommandant vun der däitscher Arméi, de Paul von Hindenburg dunn dem däitsche Kanzler Friedrich Ebert un d'Häerz geluecht huet, de Waffestëllstand z'ënnerschreiwen, egal wéi schlëmm 'en fir Däitschland wier, huet déi däitsch Delegatioun noginn.