Haut viru genee 60 Joer huet de Soulsänger Ben E. King zwee Lidder am Studio opgeholl, déi an d'Museksgeschicht agaange sinn. Dat éischt war "Spanish Harlem", dat Jore méi spéit vun der Aretha Franklin an dem Cliff Richard gecovert gouf, an dat zweet war "Stand By Me", dat nach méi bekannt gouf.
Anscheinend wollt de Ben E. King deen Dag guer net "Stand By Me" ophuelen. Hien hätt awer nach e bëssche vu senger reservéierter Studio-Zäit iwwreg gehat an hätt de Produzenten op der Plaz just nach dëst Lidd kuerz wëlle virspillen, dat hien deemools schonn, ouni Erfolleg, versicht hat senger Band "The Drifters" virzeschloen. An et ass gutt, datt de Sänger dat deen Dag gemaach huet. Well "Stand By Me" gouf natierlech e risegen Hit weltwäit. A komescherweis war d'Lidd zweemol an den Top Ten vun den amerikanesche Charts: eng Kéier am Joer 1961, wéi et erauskoum, an eng zweete Kéier am Joer 1986, wéi et als Titelsong vum Film mam selwechte Numm erauskoum. An: net ze vergiessen: 1987 gouf "Stand By Me" och an der Reklamm fir Levis-Jeans benotzt.
