arrow_back_ios
Déjà Vu
Rebel Yell (1983) - Billy Idol
"In the midnight hour she cried more more more ... with rebell yell she cried more more and more ..." Lyrics, déi praktesch kee vergiess huet. Rebel Yell ass ee vu ville Klassiker déi d'80er Jore markéiert hunn. Den 10. November 1983 gëtt Rebel Yell ënnert Chrysalis Records verëffentlecht. Eng Plack mam Keith Forsey a Steve Stevens, déi an den Electric Lady Studios zu New York produzéiert gouf. En Deel vum Album gouf ouni Perkussionist enregistréiert. Fir d'Beats hat deemools eng sougenannten elektronesch Drumm-Maschinn gesuergt. No enger hallwer Dose schonn enregistréierten Titele koum den Drummer Thommy Price an d'Spill an d'Saach ass vun do un eng Grëtz méi lieweg ginn. De Philippe Hansen erënnert un eng legendär Pop Scheif mat Punk Iwwerreschter an intensivem 80ies Flair.