Zënter Méint gëtt intensiv un der Marque Lëtzebuerg geschafft. Am Fräie Mikro stellt d'Simone Beck d'Froen: Kann een e Staat vermaarte wéi e Produit? A firwat soll een dat iwwerhaapt?
D’Lëtzebuerger Autoritéiten awer e Wee, wéi een d’Natioun Luxembourg kéint vermaarten. Wéini ass Branding noutwendeg? Wann e Produit nei agefouert gëtt a bekannt gi muss. Branding ass och noutwendeg, wann e Produit säin negativen Image muss opbesseren. Den Image vu Lëtzebuerg no baussen ass säit laangem net dee positiivsten: Steierparadäis, Freeport, steierlech Avantagë fir grouss international Firmaen, verbal Ausrutscher vu Lëtzebuerger Politiker op der Europabühn, den Ausgang vum Referendum asw.
Den englesche Politikconsultant Simon Anhalt, deen als de Papp vum Nation Branding gëllt, huet sech an der Tëschenzäit vu sengem eegene Konzept distanzéiert. An engem Interview sot hien, dass et kengem Land mat engem negativen oder schwaache Profil gelonge wier, duerch opwennege Marketing- a PR-Campagnen säin Image ze verbesseren. Déi politesch Responsabel géife vun der falscher Tatsaach ausgoen, dass duerch eng Werbecampagne vun e puer Wochen den Image vun engem Land verbessere kéint. Dat wier awer e laangjärege Prozess, dee virun allem op enger déifgräifender Ännerung vu banne misst berouen.
