Fräie Mikro
De Konflikt am Noen Osten net vergiessen
Wéinst de rezente Gewalttätegkeeten an dem Doud vun dräi jonken Israeli ass den Noen Osten nees op der Dagesuerdnung vun de Medien. Duerch d’Kricher am Irak a Syrien hate mer bal vergiess, datt de Konflikt tëscht Palästina an Israel nach ëmmer net geléist ass.
E Palästinenser, deen haut 60 Joer al ass, huet säi Liewe laang weider näischt erlieft ewéi Krich. Kann een sech dat virstellen? Déi Leit sëtzen an engem Provisorium, deen e Liewen dauert. Si hu kee Land, keen unerkannte Staat, keng Identitéit, keng Perspektiven. Kierzlech koum et erëm zu schlëmmen Eskalatioune wou jonk Palästinenser jüdesch Bierger mat Messeren iwwerfal an doud gemaach hunn. Skandaliséiert Medien diskutéieren ob et sech dann elo em eng drëtt Intifada handelt oder net. Mee déi eenzeg richteg Fro, déi net gestallt gëtt, ass: Kann d’Situatioun am Noen Osten, wou et keng Léisung fir de Konflikt gëtt, wou et net emol Hoffnung op eng Léisung gëtt, zu eppes aneschtes féiere wéi zu Gewalt.
Kee Vollek kann akzeptéiere keng Zukunft ze hunn. Datt déi jonk Generatioun sech radikaliséiert a Steng géint Messeren austauscht, kann eigentlech kee wonneren. Och d’israelesch Arméi huet hier Waffen der Zäit an de Mentalitéiten ugepasst. Kann een sech virstelle wat am Kapp vun engem jonke Palästinenser, deen zu Hebron oder Naplous opgewuess ass, virgeet? Kann hien nach dreemen oder mécht en just nach Cauchemaren?
De Fräie Mikro vum Danielle Igniti.