37 Projeten haten d'Bierger:innen agereecht. Vun der Kugelbunn, iwwer een Espace fir Gesellschaftsspiller am Fräien, bis hin zur Ludothéik. Fir eelef Virschléi geet et elo weider an d'Votingsphas.
Projeten am Interessi vun de Bierger:innen
Fir et bis an dës entscheedend Phas ze packen, muss ee Projet eng Rei Krittären erfëllen, wéi de Felix Bonne, zoustänneg fir Biergerbedeelegung an der Diddelenger Gemeng, erkläert.
"Deen éischten ass, datt en am Interêt général muss sinn. De Projet dierf net iwwer 100.000 Euro kaschten. E ganz wichtege Krittär ass, datt e keen Objectif lucratif oder kommerziellen Objectif gëtt, et muss gratis fir de Public disponibel sinn. Op där anerer Säit technesch a reglementaire ëmsetzbar sinn."
Bis den 1. Juli hunn déi Diddelenger Bierger:innen Zäit fir hire Favorit ofzestëmmen.
An der Gemeng Fréiseng huet een dës Phas schonn hanner sech. Do gëtt et dëst Joer fir déi éischte Kéier ee budget patricipatif. D'Bierger:innen hu sech ee lokale Bio-Maart gewënscht. Zu Mamer huet een iwwerdeems schonn zwee konkret Projeten opzeweisen. Dëse Mount gouf ee Muppepark ageweit, grad ewéi een digitalen Informatiounspanneau op engem Busarrêt, dee mat Solarstroum bedriwwe gëtt.
Weider Gemengen, déi op de Wee vum partizipative Budget gaange sinn, si beispillsweis Kielen, Bartreng, Betzder, Déifferdeng, Dikrech oder nach Schengen.
