An hirer Ried um Kongress vun der chrëschtlech-konservativer europäescher Parteifamill zu Bukarest huet sech d’Ursula von der Leyen nieft enger Verschäerfung vun der Migratiounspolitik an ekonomeschem Wuesstem och fir eng Sécherheets- a Verdeedegungspolitik ausgeschwat.
“Sécherheet an Europa bedeit och, méi an eis eegen Defense ze investéieren. Eist Zil sollt kloer sinn: Mir mussen ons Verdeedegungsindustrie an den nächste fënnef Joer massiv opbauen. An am Mëttelpunkt sollt een einfache Prinzip stoen: Europa muss méi investéieren, Europa muss besser investéieren an Europa muss europäesch investéieren."
Domat kéint d'Defense vun de Memberstaate moderniséiert an d'Ukrain weider ënnerstëtzt ginn, betount d'Kommissiounspresidentin. Europa sollt ustriewen, déi nächst kampffäeg Generatioun opzebauen.
