Vun dëse 14 Länner hätten der 9 bis elo Palästina nach net unerkannt, mee ugedeit, datt si an déi Richtung tendéieren. Dat ass bis elo och d'Positioun vu Lëtzebuerg.
D'Deklaratioun op der Konferenz zu New York hätt Lëtzebuerg mat ënnerschriwwen, esou déi franséisch Noriichtenagence AFP. Gëschter um Dënschdeg hat de brittesche Premier Keir Starmer ugekënnegt, datt och Groussbritannien e palästinensesche Staat bei der UNO-Vollversammlung am September wäert unerkennen, ausser Israel géif bis dohi verschidde Konditiounen erfëllen, dorënner e Waffestëllstand an der Gazasträif.
Arabesch Länner stelle Fuerderung un d'Hamas
Op der UNO-Konferenz zu New York hunn awer och e puer arabesch Länner déi radikal islamistesch Hamas opgefuerdert, d‘Waffen néierzeleeën an hir Muecht an der Gazasträif opzeginn. Eng entspriechend Deklaratioun gouf vu 17 Länner ënnerschriwwen, dorënner Ägypten, Katar, Saudi-Arabien a Jordanien.
An der Deklaratioun gëtt och déi terroristesch Attack vun der Hamas de 7. Oktober 2023 op Israel verurteelt. D‘Dokument soll zu enger Zweestaateléisung mat der Co-Existenz vun Israel an engem onofhängegt palestinensesche Staat bäidroen.
