Dem Donald Trump säi Walkampfteam hunn direkt no der Annonce am Bundesstaat Maine, an der Nuecht eiser Zäit, reagéiert a gesot, si géife géint déi Decisioun virgoen. A Colorado ass dat scho geschitt an den Donald Trump selwer huet matdeele gelooss hie géif dat Iewescht Geriicht, de Supreme Court, mat der Fro saiséieren ob säin Numm effektiv ka vun de Wallëschte gestrach ginn.
Eventuelle Verstouss géint 14. Amendement
An enger Rei Staate wéi New York, Arizona an Texas sinn de Moment d’Autoritéiten och nach amgaang un enger entspriechender Decisioun ze schaffen. Dem Donald Trump gëtt do, grad wéi a Maine an a Colorado virgehäit géint de 14. Amendement vun der Verfassung verstouss ze hunn. Déi beseet, datt ee keen Deel vun der Regierung kéint ginn, wann ee bei engem Opstand géint déi amerikanesch Verfassung matgemaach oder en ënnerstëtzt hätt.
Hannergrond ass d’Roll vum Donald Trump beim Stuerm op de Kapitol de 6. Januar viru bal dräi Joer, wou fënnef Mënsche gestuerwe sinn. Den Donald Trump hätt seng Unhänger an enger Ried dozou opgestëppelt.
Pandoras-Box
Dowéinst wier seng Demande fir bei de Virwalen de 5. Mäerz d’nächst Joer deelzehuelen, ongülteg, sou d’Argumentatioun vun der demokratescher Staatssekretärin vu Maine, déi betount huet, datt nach ni ee Kandidat op där Grondlag ausgeschloss gouf.
De republikanesche Gouverneur vu Florida Ron DeSantis seet, datt een domat eng Pandoras-Box opgemaach hätt. Domat kéint een och géint de Joe Biden virgoen, wëll Mënschen illegal ënnert senger Präsidentschaft an d’Land komm wären.
Final Decisioun läit beim Supreme Court
Et ginn och Staaten, déi géint d’Klo gestëmmt hunn, ewéi Michigan a Minnesota. Si hu sech dogéint entscheet, eng Prozedur anzeleede fir den Donald Trump vun der Wallëscht ze sträichen.
Ob den Donald Trump also géint den Demokrat Joe Biden untriede kann, wäert aller Viraussiicht no vun enger finaler Decisioun vum Supreme Court ofhänken. Deen huet momentan eng konservativ Majoritéit, wat dem ëmstriddene fréiere President dierft an d’Kaarte spillen.
