Et leeft aktuell ee Recours an eng Référés-Prozedur géint den Inneminister a géint d’Stad Lëtzebuerg um Verwaltungsgeriicht, huet gëschter d’Lydie Polfer ënnerstrach. Dowéinst géif et ee Problem gi vu Gewaltentrennung, sot d’Stater Buergermeeschtesch.
Dee Reproche vun der Lydie Polfer, datt d’Cellule scientifique vun der Chamber d’Gewaltentrennung net géif respektéieren, kéint d'Taina Bofferding net novollzéien.
"Zu deem Moment, wou ech eeben d'Cellule domadder beoptraagt hunn, du goufen et déi Recoursen nach guer net. Dofir kann ee mir net hei reprochéieren, hei wier lo e Problem um Niveau vun der Gewaltentrennung. Dat kann ech absolut guer net novollzéien."
D'Cellule scientifique vun der Chamber wier kreéiert ginn, eebe just fir d'Deputéiert an hirer Aarbecht kënnen ze ënnerstëtzen, esou d'Taina Bofferding. Esou kéint déi parlamentaresch Aarbecht gestäerkt ginn.
"An da fannen ech et äusser speziell, wann eng Deputéiert déi Aarbecht, déi hei geleescht gëtt, elo als en einfachen Avis duerstellt."
D'Taina Bofferding ass der Meenung, datt d'Lydie Polfer d'Conclusioune vun där Analys och just géif a Fro stellen, well se hir net géife gefalen.