Der MUDAM Direktesch Bettina Steinbrügge gëtt virgeworf, si géif Favoritismus bedreiwen. Och Virwërf vu Mobbing stinn am Raum. D’Konsequenz waren, engem RTL-Artikel no, eng hallef Dosen Demissioune beim Personal a beim Verwaltungsrot. An dat zënterdeem d’Bettina Steinbrügge am Joer 2022 den Directiounsposten iwwerholl huet.
Ënner anerem hat och de fréiere President vum Verwaltungsrot Patrick Majerus demissionéiert. De Patrick Majerus huet sech bis ewell awer net wollten dozou äusseren.
Eric Thill: "Ech huelen déi Äusserungen eescht"
Am 100,7-Interview verweist den DP-Kulturminister drop, datt de MUDAM eng wichteg Kulturinstitutioun wier.
"Ech wëll awer och soen, datt verschidde Meenungen, déi villäicht elo rezent och an der Press zirkuléieren, net de Wäerter an och net déi deeglecher Realitéit vum MUDAM erëmspigelen.”
Änlech hate sech Spriecher vum MUDAM haut och géigeniwwer dem Lëtzebuerger Wort geäussert.
Direktioun vum MUDAM äussert sech net
Am September war eng extern Berodungsfirma ugestallt gi fir den Ist-Zustand vun den Aarbechtskonditiounen ze maachen. Déi Bestandsopnam géif dem Verwaltungsrot elo och virleien. Fir den Eric Thill misst de Kulturministère elo eng begleedend Roll spillen.
“Dëse Prozess, déi Decisiounen, déi elo geholl ginn, dat ass awer d'Decisioun vun engem Verwaltungsrot. A wou ech nach eng Kéier awer grousst Vertrauen hunn an de CA mat hirem neie President, fir déi richteg Schlëss aus där Bestandsopnam ze zéien.”
D’Direktioun vum MUDAM huet sech op eis Nofro net wëllen zu der Situatioun äusseren. Et géif ee sech zeréckmellen Zitat “en temps voulu”.
