Zanter dem 14. Oktober organiséiert de “Comité pour une Paix Juste au Proche-Orient”all Woch eng Demonstratioun hei an der Stad.
Zu hirer Motivatioun, bei dëser Manifestatioun dobäi ze sinn, hunn d’Leit gesot:
"Ech wëll net nach méi onschëlleg Leit dout gesinn. Si mussen ophale mat Leit ze bommen a jiddereen ëmzebréngen."
Et kéint een net einfach weider nokucke wat an der Gazasträif geschitt, huet een aneren Demonstrant eis op der Clairefontainesplaz gesot:
"Ech hu bis viru Kuerzem zu Tel Aviv gelieft an hunn decidéiert elo wech ze zéien, do meng Aarbecht opzeginn, zeréck op Lëtzebuerg ze plënneren, well ech net domat averstane sinn, wat am Moment geschitt."
Zanter Enn Oktober ass d’Buedemoffensiv an der Gazasträif am gaangen. Israel huet ugegraff, no der Terror-Attack vum 7. Oktober vun der islamistescher Hamas an aneren extremistesche Gruppen.
"Natierlech, déi Attack vum 7. Oktober war ganz schlëmm. Mee déi Äntwert, déi mir de Moment gesinn, ass net konstruktiv, kann néierens hi féiere wou iergendwéi Fridden och nëmmen um Horizont ze erkennen ass. Jo, dat muss einfach ophéieren."
Der Police no ware beim Cortège hei an der Stad eng 600 Leit mat dobäi. Et hätte keng Tëschefäll ginn. Aussergewéinlech wier gewiescht, datt e puer Demonstrante sech am fréie Mëtteg virun der US-Ambassade um Lampertsbierg versammelt haten, war op eis Nofro hi gewuer ze ginn.
