Op den éischte Februar vun dësem Joer haten d‘Presidentin vum Verwaltungsrot an de Generaldirekter vum Staatslabo mateneen demissionéiert. Wéi d‘Gesondheetsministesch Martine Deprez elo an hirer Äntwert op eng parlamentaresch Fro schreift, hätten der Presidentin hir strategesch Visiounen net mat deene vun den anere Membere vum Verwaltungsrot iwwerenee gestëmmt.
Strategie soll ëmmer nees hannerfrot ginn
Wat den Direkter betrëfft, deen no engem Mount nees demissionéiert huet, sou hätt dee sécher technesch Kompetenze gehat. Hie wier awer net bereet gewiescht fir zesumme mam Verwaltungsrot eng nei Strategie fir de Labo auszeschaffen. Et wier awer noutwendeg, datt de Staatslabo seng Strategie ëmmer nees hannerfreet, sou d‘Ministesch, déi och nach erkläert, datt d‘Diskussiounen iwwer eng nei Strategie grad ugefaangen hätten.