D'EU wëllt sech beroden, fir mat der Energiekris ëmzegoen, fir den Impakt op d'Memberlänner esou kleng wéi méiglech ze halen.
Och den ukrainesche President Wolodymyr Selenskyj ass op Zypern bei deem informelle Sommet dobäi. Hien huet den Deblockage vum europäeschen Hëllefspak begréisst.
Prêt vun 90 Milliarden Euro fir d'Ukrain
D’Europäesch Unioun huet haut formell dee Prêt vun 90 Milliarden Euro fir d’Ukrain op de Wee bruecht, nodeems gëschter Ungarn säi Veto opginn hat.
D‘EU ass sech och eens ginn iwwer een neie Sanktiounspak géint Russland. Den zwanzegste Pak mat Sanktiounen hätt scho sollen am Februar a Kraaft trieden. E gesäit ënner anerem vir, datt europäesch Entreprisen sech net dierfen u Reparatioune vu russesche Raffinerië bedeelegen, déi duerch ukrainesch Attacke beschiedegt goufen. Et sollen och weider Banke vum Kommunikatiouns-System Swift ofgekoppelt ginn.
Et ass een sech awer net eens ginn doriwwer, all Servicer déi mam Transport vu russeschem Pëtrol zesummenhänken, ze verbidden.
