De Moien huet d‘Annonce vum Comeback vun der fréierer Band Oasis fir grouss Opreegung gesuergt. No jorelaangem Sträit wëllen déi zwee Bridder Noel a Liam Gallagher rëm gemeinsam optrieden. Dat hunn si an de soziale Medien confirméiert.
Viru 15 Joer hat den Noel Gallagher d'Band wéinst engem Sträit mat sengem Brudder verlooss (Foto: picture alliance / Photoshot | -)
Geplangt si Concerten, d‘nächst Joer, zu Cardiff, Manchester, London, Edinburgh an Dublin. Déi brittesch Band hat sech viru 15 Joer getrennt, den Noel Gallagher hat d‘Grupp am Sträit mat sengem Brudder verlooss.
Mat Lidder wéi „Wonderwall“, „Don't Look Back in Anger“ a „Supersonic“ huet Band vu Manchester d‘1990er Jore gepräägt. Oasis ass eng vun den erfollegräichste Bands an der brittescher Museksgeschicht.
