Op enger Drénglechkeetssëtzung vum UNO Sécherheetsrot hunn Hëllefsorganisatioune vun der UNO widderholl, eng humanitär Waffepaus wier dréngend néideg. D‘Situatioun an der Gazasträif géif sech vu Stonn zu Stonn verschlechteren, Dausende Kanner géife stierwen, esou d‘Unicef.
Israel huet seng Buedemoffensiv an der Gazasträif weider ausgebreet. Déi israeelesch Truppe wieren elo op béide Säite vun der Stad Gaza opgestallt, esou Berichter. Gëschter Owend hat d‘Arméi gemellt, datt eng israeelesch Zaldotin befreit gi wier, déi de 7. Oktober vun der Hamas als Geisel geholl gouf.
D‘Hamas huet hirersäits e Video verëffentlecht vun dräi Fraen, déi als Geisel gehale ginn. Den israeelesche Premier sot de Video wier eng grausam psychologesch Propaganda.
