Och déi polnesch Arméi huet d‘lescht Nuecht Militäroperatiounen an der Loft ugekënnegt. Dat an der Suite vun der russescher Dronenattack no bei engem polnesch-ukrainesche Grenzposten.
Russescht Schëff beschéisst dänesche Militärfliger mat Liichtrakéiten
En Incident gouf et och an der Ostsee. Do huet e russescht Krichsschëff zwou Liichtrakéiten op en Helikopter vun der dänescher Arméi geschoss. Den däneschen Helikopter war fir eng routineméisseg Foto-Opklärung virun engem däneschen Hafen ënnerwee, wéi de Ministère zu Kopenhagen matgedeelt huet.
Eng vun de Liichtrakéiten hätt den Helikopter knapps verpasst. Déi dänesch Premierministesch Mette Frederiksen schwätzt vun engem irresponsabele Virfall an huet de russeschen Ambassadeur zu Kopenhagen convoquéiert.
Russland wéilt mat esou Aktiounen der Ukrain hir Alliéiert veronsécheren an hinnen Angscht maachen, mee et géif ee sech net aschüchtere loossen.
D’EU-Kommissiounspresidentin Ursula von der Leyen huet an deem Kontext vun engem onverantwortlechen a geféierleche Verhale vu Russland geschwat.
Russland huet aner Versioun
De russeschen Ambassadeur an Dänemark huet de Mëtteg eng aner Versioun geliwwert. De Wladimir Barbin huet vill méi vu provokative Manövere vum däneschen Helikopter geschwat. Datt d’Dänen dat e Routineexercice nenne géifen, géif ee ferm beonrouegen, esou de russeschen Ambassadeur an Dänemark.
