An Thailand gouf een Australier wéinst virsätzlechem Mord ugeklot nodeems d‘Läich vun engem 17-Joer alen thailännesche Meedchen an enger Wallis fonnt gouf. Dat mellt d‘Police. De 45 Joer alen Australier gouf gëschter Owend um Flughafen zu Bangkok festgeholl, wéi en an Australie wollt fléien.
Iwwerwaachungsbiller géifen de Mann weisen, wéi e mam Meedchen an eng Villa eragaangen ass an den Dag selwer Owes mat enger grousser Wallis erëm erauskomm wier. D‘Läich soll Zeeche vu Gewalt hunn.
De Mann streit d‘Virwërf all of. Hie riskéiert liewenslängleche Prisong oder d‘Doudesstrof.
