Déi iranesch Delegatioun sot, datt d’USA ze vill streng Demande gemaach haten.
Déi vill Plakater mat den dräi Fändele Pakistan, USA an Iran, ginn elo schonn ofgebaut zu Islamabad. Et gëtt kee Succès ze annoncéiere fir de Mediateur Pakistan. Si wëllen hire Rôle awer weiderhin halen a ruffe Washington an Teheran op weider Gespréicher ze feieren.
Éischt esou héichrangeg Gespréicher zënter 1979
De Gedanken ass, datt se esou katastrophal dach net wieren, dës sougenannt Islamabad-Gespréicher. Si hu ganzer 21 Stonne gedauert. Iwwerdeems war et déi éischte Kéier, datt esou héich Delegatioune vu Washington an Teheran sech zënter der islamescher Revolutioun 1979 face à face getraff hunn.
Elo kuckt een nees gespaant an ängschtlech op d’Konte vum US-President Donald Trump op de sozialer Medien. Ob d’Wafferou hält entscheet hien elo. Wäert hien nees eng amerikanesch Victoire deklaréieren, e weidert Ultimatum opstellen an dem Iran nees mat Zerstéierung Angscht maachen?
Iran behält Kontroll iwwer Hormuspassage
Béid Länner gesi sech weiderhin als Gewënner am Krich, do waren d’Viraussetzunge fir e Fridden ni gutt. D’USA soen, datt den Iran militäresch um Enn ass. Den Iran ass stolz, datt de Regimm gréisstendeels iwwerlieft huet an datt ee weiderhin d'Kontroll vun der Strooss vun Hormus behält.
Dat ass den iranesche Joker an dëse Negociatioune gewiescht. Ob et do en Akkord gouf déi wichteg Mieresstrooss nees opzemaachen ass nach net gewosst. Béid Delegatioune sinn elo um Wee heem an hir respektiv Länner.
Eise Korrespondent Philip Crowther huet d’Detailer aus der pakistanescher Haaptstad Islamabad
