Dës Woch hat eng zweet Ronn vun indirekte Gespréicher tëschent den USA an dem Iran stattfonnt. D‘USA fuerderen, datt den Iran säin Atomprogramm reduzéiert. Den Iran fuerdert am Géigenzuch, datt d'Sanktioune géint den Iran opgehuewe ginn. Bis elo gouf keen Accord fonnt, béid Länner wëllen d‘Verhandlunge viruféieren.
USA sinn 2018 aus Atom-Accord mam Iran ausgetrueden
Den Donald Trump war am Joer 2018 aus dem JCPOA, dem Joint Comprehensive Plan of Action, mam Iran ausgetrueden. D'Nuklearofkommes war am Joer 2015 zu Wien tëschent Däitschland, Frankräich, Groussbritannien, den USA, Russland, China an dem Iran ënnerschriwwe ginn. Am Accord war festgehalen, datt den Iran keen Uran uräichert fir Atomwaffen ze bauen. Am Géigenzuch haten déi aner Länner d'Sanktioune géint den iranesche Staat opgehuewen.
Der internationaler Organisatioun fir Atomenergie IAEA no, déi d'Opsicht am Iran hat, huet de schiitesche Staat sech bis an d'Joer 2019 un déi festgeluechte Limitatioun aus dem JCPOA-Accord gehalen.
