Mat der Wal vun der Susan Crawford huet dat Geriicht och fir déi nächst dräi Joer eng liberal Majoritéit.
D'Riichter-Wal am Staat Wisconsin gëllt als éischte Stëmmungstest no der US-Presidentewal.
D'Susan Crawford huet sech géint de Konservative Brad Schimel duerchgesat. Hie war vum Elon Musk mat Milliounen Dollar ënnerstëtzt ginn. Och de President Donald Trump hat sech aktiv fir dee konservative Kandidat engagéiert.
Ried vu 25 Stonnen am Senat
Am amerikanesche Senat huet iwwerdeems den demokratesche Senateur Cory Booker aus New Jersey eng Ried vu 25 Stonne géint den Donald Trump gehalen. Hien huet domat de Rekord gebrach vun der längster Ried jeemools am amerikanesche Senat.
Hien huet seng Ried méindes um 7 Auer owes Lokalzäit ugefaangen. Den Dag drop, géint 8 Auer owes, huet hien opgehale mat schwätzen. No 25 Stonnen a véier Minutten.
Den Haaptmessage an där Ried war, datt d'USA an déi ganz Welt wéinst dem Donald Trump mat enger graver an urgenter Gefor konfrontéiert wieren.
