De Generalsekretär vun der Chamber, Laurent Scheeck, erkläert, et misst een an all Walbezierk eng komplett Lëscht hunn an op d'mannst ee Sëtz an der Chamber kritt hunn.
Zomm ass gestaffelt
D’Zomm fir dës Ënnerstëtzung fir d’Walkampfkäschten ass gestaffelt: Eng Partei, déi zum Beispill 13 Sëtz an der Chamber kritt, huet d’Recht op 330.000 Euro.
"Dat setzt sech an dësem Fall zesummen aus engem Forfait vun 200.000 Euro, déi een ab 12 Deputéierten zu gutt huet, sou wéi dat am Walgesetz fest geschriwwen ass. An da kommen nach pro Deputéiert 10.000 Euro zesummen: also 130.000 Euro, déi nach bei déi 200.000 Euro dobäi kommen."
Remboursementer vun de Walkampagnen 2013
| Partei | Zomm |
|---|---|
| CSV (23) | 430.000 |
| LSAP (13) | 330.000 |
| Demokratesch Partei (13) | 330.000 |
| Déi Gréng (6) | 160.000 |
| ADR (3) | 80.000 |
| Déi Lénk (2) | 70.000 |
1,9 Milliounen Euro goufe budgetiséiert
Fir een Deel vun de Walkampf-Käschten zréck bezuelt ze kréien, kënnen d’Parteie sech nom 8. Oktober un d’Chamber riichten, erkläert de Generalsekretär Laurent Scheeck.
D'Gesetz schreift vir, datt e Remboursement vun der Campagne fir d'Chamberwalen um Niveau vum Parlament budgetiséiert gëtt.
"An hei goufen 1,9 Milliounen Euro budgetiséiert fir d’Legislativen am Oktober, awer och fir d’Europawalen, déi d’nächst Joer stattfannen."
Remboursementer vun de Walcampagnen 2018
| Partei | Zomm |
|---|---|
| CSV (23) | 410.000 |
| LSAP (13) | 330.000 |
| Demokratesch Partei (12) | 320.000 |
| Déi Gréng | 220.000 |
| ADR (4) | 90.000 |
| Déi Lénk (2) | 70.000 |
| Piraten (2) | 70.000 |
Remboursementer gi sou séier wéi méiglech gemaach
Rezent hätt de Chamberpresident beim Premier ugefrot, datt déi 1,9 Milliounen Euro sollen un d’Chamber iwwerwise ginn. Déi Zomm also, déi am Staatsbudget fir d’Zréckbezuele vun de Walkampfkäschte steet.
D'Administratioun wier och sou opgestallt, datt Remboursementer, soubal d'Justifikatife vun de Parteie virleien, kënne gemaach ginn, betount de Laurent Schleeck.
Nieft dësem Remboursement iwwert d’Chamber, kënnen d’Parteie beim Staatsministère, och ënner Konditiounen, zousätzlech d’Zréckbezuelen, vu Portokäschte fir eng gedréckte Walkommunikatioun un all d’Haushälter, ufroen.