De Gary Kneip war am Süden op der Lëscht, de Georges Keipes am Zentrum an de Jacques Linster souguer als Spëtzekandidat am Osten. An engem Communiqué vu Fokus gëschter Owend hat et geheescht, datt déi dräi Falschinformatioune verbreet, vertraulech Informatiounen no bausse gedroen a souguer probéiert hätten, intern Diskussioune mat engem Handy opzehuelen. Doropshi wier unanime decidéiert ginn, déi dräi aus der Partei auszeschléissen.
Marc Ruppert schléisst eng Plainte net aus
De Parteipresident Marc Ruppert sot eis, datt et virgëschter selwer bei der Sëtzung vum Nationalcomité zum Virfall mat der presuméierter Opnam koum, deen um Enn zum Ausschloss gefouert huet. Déi Responsabel vun der Partei géifen och iwwer eng eventuell Plainte géint déi dräi Ex-Memberen nodenken.
Déi dräi ausgeschlosse Memberen vun der Partei Fokus gesi sech muer den Owend, fir selwer iwwer méiglech juristesch Schrëtt ze beroden.
Fir den Ex-Generalsekretär Gary Kneip geet et iwwerdeems drëms, dass d’Statutten agehale ginn. De Respekt vun den eegene Regelen an eng Transparenz, wat zum Beispill d’Finanzen ugeet, wieren dobäi dat éischt Gebot.
